विक्रमी वेळ आणि सूक्ष्म नियोजन

ब्रिटीशकालीन १३० वर्षे जुना असलेला हा पूल धोकादायक ठरवून पाडण्यात आला होता. त्यानंतर सप्टेंबर २०२४ मध्ये कामाचा आदेश देण्यात आला. या पुलाच्या कामासाठी खरंतर अजून ४ महिन्यांचा अवधी शिल्लक होता, मात्र पालिका आयुक्त भूषण गगराणी यांच्या मार्गदर्शनाखाली आणि अतिरिक्त आयुक्त अभिजीत बांगर यांच्या देखरेखीखाली हे काम युद्धपातळीवर पूर्ण करण्यात आले.

आव्हानांवर मात करत पूर्णत्वास

हा पूल उभा करणे पालिकेसाठी सोपे नव्हते. कामादरम्यान अनेक तांत्रिक आणि सामाजिक अडचणी आल्या:अडथळ्यांचे स्थलांतर: बेस्टच्या वाहिन्या हलवणे आणि पुलाच्या कामात अडथळा ठरणारी १३ बांधकामे हटवून त्यांचे पुनर्वसन करणे.पावसाळ्यातही काम सुरू: सूक्ष्म नियोजनामुळे पावसाळ्यातील ४ महिनेही काम अविरत सुरू ठेवण्यात आले.न्यायालयीन लढा: उच्च न्यायालयातील खटला आणि स्थानिक गृहनिर्माण संस्थेची सीमाभिंत हटवणे अशा आव्हानांवर मात करून अभियंत्यांनी हे यश मिळवले.

पुलाची वैशिष्ट्ये आणि फायदा

एकूण लांबी- ३३३ मीटर
रेल्वे हद्दीतील लांबी- ३६.९० मीटर
वाहतूक मार्ग रुंदी- ७ मीटर (दोन्ही बाजूला पदपथांसह)
उपयोग- ताडदेव, नागपाडा आणि मुंबई सेंट्रलला जोडणारा मार्ग

वाहतूक कोंडीतून सुटका

बेलासिस पूल कार्यान्वित झाल्यामुळे दादासाहेब भडकमकर मार्ग, पठ्ठे बापूराव मार्ग आणि महालक्ष्मी स्थानक परिसरातील वाहतुकीचा ताण लक्षणीयरीत्या कमी होणार आहे.

लवकरच लोकार्पण?

पुलाची अंतिम कामे ६ जानेवारी २०२६ रोजी पूर्ण झाली आहेत. भार चाचणी (Load Test) आणि संरचनात्मक स्थिरता प्रमाणपत्रही प्राप्त झाले आहे. आता रेल्वे विभागाचे ‘ना-हरकत प्रमाणपत्र’ (NOC) मिळताच, वाहतूक पोलिसांच्या समन्वयाने हा पूल सर्वसामान्यांसाठी खुला केला जाणार आहे.

“काटेकोर नियोजन आणि शिस्तबद्ध अंमलबजावणी केल्यास विकासकामे मुदतीपूर्वी पूर्ण होऊ शकतात, याचे बेलासिस पूल हे उत्तम उदाहरण आहे. नागरिकांची गैरसोय टाळण्यासाठी आम्ही यापुढेही अशाच गतीने काम करू.” — अभिजीत बांगर (अतिरिक्त महानगरपालिका आयुक्त, प्रकल्प)