पुणे आणि पिंपरी-चिंचवड महापालिकेच्या निवडणुकीत अजित पवार यांनी भाजपवर जोरदार प्रहार करून त्यांना प्रचारादरम्यान जेरीस आणले होते. पुण्यातील त्रिकूट; तर पिंपरी-चिंचवड येथे आमदार महेश लांडगे यांच्यावर जोरदार प्रहार करून पवार यांनी या निवडणुकीत रंगत आणली होती. फडणवीस यांनीही पवार यांचे नाव न घेता त्यांनी आरसा पाहावा, अशी टीका केली होती. मात्र, निकालानंतर दोन्ही महापालिकांमध्ये भाजपच दादा ठरला. पवार यांनी भाजपवर केलेल्या टीकेच्या अनुषंगाने त्यांना सव्याज परतफेड करण्यासाठी भाजपकडून जिल्हा परिषदेची संधी साधण्यात येत आहे. जिल्हा परिषदेच्या कारभाराची गोपनीय चौकशी सुरू करण्यात आली असून त्याचा वापर प्रचारादरम्यान पवारांना अडचणीत आणण्यासाठी केला जाण्याची शक्यता आहे.

Pune News : दोन्ही राष्ट्रवादीत काहीतरी मोठं घडतंय, रोहित पवार अजित पवारांच्या भेटीला
पुणे जिल्हा परिषद ७३ गट तसेच तालुका पंचायतीच्या १४६ गणांसाठी निवडणुकींची घोषणा झाली असून भाजप आणि शिवसेनेच्या युती करण्यासाठी हालचाली सुरू झाल्या आहेत. पुणे जिल्हा परिषदेचे ७३ सदस्य असून या सर्व ठिकाणी सक्षम उमेदवार देण्यासाठी युतीकडून तयारी करण्यात येत आहे. केंद्रीय राज्यमंत्री मुरलीधर मोहोळ आणि माजी मंत्री विजय शिवतारे यांच्यात बैठका झडत असून युतीच्या माध्यमातून निवडणुकीला सामोरे जाण्याचा प्रयत्न सुरू आहे. दोन्ही पक्षांची युती झाली, तर राष्ट्रवादी काँग्रेससमोर आव्हान उभे राहण्याची शक्यता आहे. या निवडणुकीच्या प्रचारादरम्यान मुख्यमंत्री फडणवीस यांच्याकडूनही पवारांना त्यांनी केलेल्या आरोपांची परतफेड केली जाणार असल्याचे त्यांच्या स्थानिक नेत्यांकडून सांगण्यात येत आहे.

भाजपने स्थानिक स्वराज्य संस्थांच्या निवडणुका डोळ्यासमोर ठेवून माजी आमदार संग्राम थोपटे, संजय जगताप यांचा भाजप प्रवेश करून घेतला आहे. याशिवाय इंदापूर येथील प्रदीप गारटकरही भाजपवासी झाले आहेत. आमदार राहुल कुल यांच्याकडून या सर्व मंडळींमध्ये समन्वय साधण्यात येत असून आगामी निवडणूक लढण्यासाठी तयारी सुरू करण्यात येत आहे. या सर्वांना मुख्यमंत्री फडणवीस यांचे पाठबळ असून अजित पवार यांना जिल्ह्यातही रोखण्यासाठी सर्वोतोपरी प्रयत्न करण्यात येत आहे. भाजप आणि शिवसेनेचे जागा वाटपाबाबत चर्चा झडत असून येत्या दोन दिवसांत युतीची घोषणा करण्याची दाट शक्यता आहे.

Pune Traffic: पुणेकरांसाठी मोठी बातमी! शहरातील प्रमुख रस्ते आज 9 तासांसाठी राहणार बंद; पर्यायी मार्ग कोणते? जाणून घ्या
दोन्ही राष्ट्रवादींची आघाडी
पुणे आणि पिंपरी-चिंचवड महापालिका निवडणुकीनंतर आता पुण्यासह राज्यातील जिल्हा परिषद आणि पंचायत समित्यांची निवडणूक दोन्ही राष्ट्रवादी एकत्रित लढणार असल्याचे जवळपास स्पष्ट झाले आहे. उपमुख्यमंत्री अजित पवार यांनी राष्ट्रवादी काँग्रेस शरदचंद्र पवार पक्षाच्या १०५ इच्छुकांच्या मुलाखती रविवारी घेतल्या. ही निवडणूक घड्याळ चिन्हावर लढावी लागू शकते, अशी सूचना पवार यांनी केल्याचे समजते.