सुधीर पाटील, सातारा : राज्यातील महापालिकांसाठी गुरुवारी मतदान झालं. त्याच रात्री झेडपी, पंचायत समिती निवडणुकीसाठी साताऱ्यात राजकीय घडामोडी सुरु होत्या. पालकमंत्री शंभूराज देसाई यांच्या निवासस्थानी मदत व पुनर्वसन मंत्री मकरंद पाटील, खासदार नितीन पाटील आणि रामराजे नाईक-निंबाळकर यांच्यात रात्री उशीरापर्यंत खलबते झाली. भाजपला वगळून झालेल्या या बैठकीमुळे महायुतीतील बेबनाव उघड झाला आहे. कराड तालुक्यात काँग्रेस आणि राष्ट्रवादी शरदचंद्र पवार पक्षाचे सूर जुळतील, असेही संकेत मिळत आहेत.
साताऱ्यात पालकमंत्री शंभूराज देसाई आणि आमदार महेश शिंदे यांच्या उपस्थितीत गुरुवारी दुपारी शिवसैनिकांचा मेळावा झाला. त्यानंतर त्यांनी पत्रकार परिषद घेतली. घटक पक्षांनी शिवसैनिकांचा (शिंदे गट) सन्मान केल्यास निश्चितच महायुती म्हणून विचार होईल. वाटाघाटी यशस्वी झाल्या तर एकत्रितपणे निवडणुकीला सामोरे जाऊ. मानसन्मान राखला तर ठीक अन्यथा स्वबळावर लढू किंवा इतर चर्चेचे पर्याय आमच्यासाठी खुले असतील, असे स्पष्ट संकेत पालकमंत्र्यांनी दिले.
Maharshtra Municipal Election Result Live Updates
महायुती झाली नाही तर शिवसेना स्वतंत्र निवडणूक लढवणार आहे. त्यावेळी आम्ही कोणाचाही विचार करणार नाही. राष्ट्रवादी बरोबर (अजित पवार गट) अद्याप कोणताही निर्णय झालेला नाही. तसेच भारतीय जनता पार्टीकडून सुद्धा कोणत्याही प्रकारचा प्रस्ताव आपल्याला आला नसल्याचे पालकमंत्र्यांनी पत्रकार परिषदेत स्पष्ट केले होते. त्यानंतर रात्री भाजपला वगळून शिवसेना आणि राष्ट्रवादी नेत्यांची पालकमंत्र्यांच्या निवासस्थानी कमराबंद बैठक झाली.
BMC Election Result : मुंबईत मतटक्का घसरला, ठाकरेंच्या पथ्यावर की विरोधात? आकड्यांचा खेळ समजून घ्या
साताऱ्याची जिल्हा परिषद ही यशवंत विचारांची आहे. त्यामुळे या निवडणुकीत भारतीय जनता पार्टीला रोखण्यासाठी शिवसेना आणि राष्ट्रवादी काँग्रेस एकत्रित निवडणूक लढवणार असल्याचे संकेत मिळाले. त्या अनुषंगाने दोन्ही पक्षांच्या नेत्यांमध्ये चर्चेची प्राथमिक फेरी पालकमंत्र्यांच्या निवासस्थानी पार पडली. भाजपला वगळून ही बैठक झाल्याने आता भाजप नेते काय भूमिका घेतात, हे पाहणे महत्त्वाचे आहे. दुसरीकडे कराड उत्तरमध्ये कॉंग्रेस आणि राष्ट्रवादी शरदचंद्र पवार पक्ष एकत्र येण्याची चिन्हे आहेत.
Nagpur News : माझे मतदान परस्पर केले; केंद्र अधिकाऱ्यानेच EVM बटण दाबलं, तरुणीची तक्रार, बूथवर राडा
पालकमंत्री शंभूराज देसाई यांच्या निवासस्थानी झालेल्या बैठकीला मदत व पुनर्वसन मंत्री मकरंद पाटील, राज्यसभा खासदार नितीन पाटील, विधान परिषदेचे आमदार रामराजे नाईक-निंबाळकर आणि त्यांचे बंधू संजीवराजे नाईक-निंबाळकर उपस्थित होते. बैठकीनंतर पालकमंत्र्यांच्या निवासस्थानातून बाहेर पडताना पत्रकारांनी बैठकीबद्दल विचारले असता, ‘पालकमंत्र्यांचा चहा गोड होता’, असे सांगत भाजपला वगळून निवडणूक लढवली जाणार असल्याचे सूचक संकेत रामराजे नाईक-निंबाळकरांनी दिले.
लेखकाबद्दलअनिश बेंद्रेअनिश सतीश बेंद्रे, महाराष्ट्र टाइम्स ऑनलाईनमध्ये सहाय्यक वृत्त संपादक पदावर कार्यरत आहेत. गेल्या तीन वर्षांपासून ते मटासोबत काम करत आहेत. राजकीय, गुन्हेगारी आणि मनोरंजन या विषयातील बातम्यांमध्ये त्यांचा विशेष हातखंडा आहे. ब्रेकिंग न्यूजसोबतच निवडणूक विषयक विश्लेषण करण्यात त्यांना अधिक रस आहे. त्यांनी झेविअर्स कॉलेजमधून मास कम्युनिकेशनचे पदव्युत्तर शिक्षण घेतले आहे. आतापर्यंत एबीपी माझा, टीव्ही9 मराठीसह पत्रकारिता क्षेत्रात 12 वर्षांहून अधिक काळचा अनुभव त्यांना आहे… आणखी वाचा