ठाकरे बंधूंकडून महाराष्ट्र नवनिर्माण सेनेच्या उमेदवार पारुबाई कटके, महायुतीतर्फे शिवसेनेकडून लढणाऱ्या राहुल शेवाळे यांच्या वहिनी वैशाली शेवाळे यांना पराभवाचा धक्का बसला आहे. याशिवाय राष्ट्रवादीच्या राजश्री खाडे, बसपच्या मंगल भगतही रिंगणात होत्या. मात्र काँग्रेसच्या तिकिटावर आशा काळे विजयी झाल्या आहेत. धारावी हा काँग्रेसचा बालेकिल्ला असून वर्षा गायकवाड-ज्योती गायकवाड या भगिनींचे तिथे वर्चस्व आहे. त्यामुळे काँग्रेसचं प्राबल्य असलेल्या प्रभागात अपेक्षित यश मानले जात आहे.

राज्य निवडणूक आयोगाने जाहीर केलेल्या आकडेवारीनुसार, २९ महापालिकांमधील २,८६९ जागांसाठी ही निवडणूक होणार होती. मात्र, ६८ उमेदवार बिनविरोध निवडून आल्याने गुरुवारी २,८०१ जागांसाठी मतदान घेण्यात आले. या जागांसाठी एकूण १५,९३१ उमेदवार रिंगणात असून, राज्यातील दीड कोटीहून अधिक मतदारांनी मतदानाचा हक्क बजावून या उमेदवारांचे भवितव्य इलेक्ट्रॉनिक मतदान यंत्रात बंद केले.