राज्यभरात एकूण ३ कोटी ४८ लाख ७८ हजार १७ मतदारांची नोंदणी झाली असून, निवडणूक रिंगणात एकूण १५ हजार ९३१ उमेदवार आपले नशीब आजमावत आहेत. राज्यातील सत्तासंघर्षानंतर पहिल्यांदाच होणाऱ्या या महापालिका निवडणुकांसाठी भाजप आणि दोन्ही शिवसेनांसह, मनसे, काँग्रेस, दोन्ही राष्ट्रवादी काँग्रेस या सर्वच प्रमुख पक्षांसाठी ही निवडणूक अतिशय महत्त्वाची आहे.

मुंबई महानगरपालिका निवडणुकीकडे सर्वांचे लक्ष लागून राहिले आहे. या निवडणुकीत मुख्यमंत्री देवेंद्र फडणवीस व उपमुख्यमंत्री एकनाथ शिंदे यांच्या विरोधात ठाकरे बंधू असा जंगी सामना रंगणार आहे. उपमुख्यमंत्री अजित पवार यांनी पुणे-पिंपरी-चिंचवडमध्ये आपली शक्ती केंद्रित केली आहे. अनेक नेत्यांचे राजकीय भविष्य ठरवणारी आणि राज्याच्या राजकारणावर दूरगामी परिणाम करणारी अशी ही महापालिका निवडणूक असणार आहे. उद्या, शुक्रवारी मतमोजणी होणार असून, दुपारी ४ वाजेपर्यंत निकालाचे चित्र पूर्णपणे स्पष्ट झालेले असेल.
BMC Election 2026: ठाकरे बंधू की महायुती? मुंबईच्या महासंग्रामाचा ‘काऊंटडाऊन’ सुरू; मतदानासाठी महापालिकेची यंत्रणा सज्ज
एकूण १५,९३१ उमेदवार रिंगणात
राज्यातील २९ महापालिकांच्या एकूण ८९३ प्रभागांसाठी १५,९३१ उमेदवार अंतिमतः रिंगणात उरले आहेत. विशेष म्हणजे, ८ हजार ८४० उमेदवारांनी आपली उमेदवारी मागे घेतली होती. या माघारीवरून आणि बिनविरोध विजयावरूनही बरेच रणकंदन माजले. निवडणुकांसाठीच्या मतदार यादीतील मतदाराचे नाव, मतदान केंद्र आणि उमेदवारांविषयी माहिती जाणून घेण्यासाठी निवडणूक आयोगाने ‘मताधिकार’ हे मोबाइल अॅप उपलब्ध करून दिले आहे