पैशांचा वाद हत्येत बदलला

माणगाव पोलीस स्टेशन येथे गुन्हा रजिस्टर क्रमांक 17/2026 अन्वये भारतीय न्याय संहिता कलम 103 (1) व 3 (5) अंतर्गत गुन्हा दाखल करण्यात आला आहे. या प्रकरणातील मुख्य आरोपी सोन्या उर्फ प्रज्वल संतोष हंबीर (रा. खांदवेनगर, वाघोली, ता. हवेली, जि. पुणे) हा घटनेनंतर फरार झाला होता. पैशांच्या व्यवहारातून झालेल्या वादाचं रूपांतर हाणामारीत होऊन अखेर थेट हत्येत झालं, असं तपासात समोर आलं आहे. तर या प्रकरणात पुणे कनेक्शन देखील असल्याचं सांगण्यात येत आहे.
Tamhini Ghat : पुण्याहून महाबळेश्वरला फिरायला, पैशांवरुन जोरदार भांडण, ताम्हिणी घाटात रक्तरंजित थरार; कारमध्येच सोलापूरच्या मित्राला संपवलंरायगड पोलिसांकडून आरोपीचा कसून शोध सुरू असतानाच, दि. 13 जानेवारी 2026 रोजी आरोपी सोलापूरहून पुण्याच्या दिशेने इंद्रायणी एक्सप्रेसनं प्रवास करत असल्याची गोपनीय माहिती पुणे लोहमार्ग पोलीस दलाच्या पोलीस अधीक्षक अश्विनी सानप यांना मिळाली. माहिती मिळताच त्यांनी तात्काळ स्थानिक गुन्हे शाखेचे सहाय्यक पोलीस निरीक्षक बाळासाहेब अंतरकर आणि दौंड लोहमार्ग पोलीस ठाण्याचे प्रभारी अधिकारी पोलीस निरीक्षक राजेंद्र गायकवाड यांना सूचित केलं.

प्रवाशास त्रास न देता आरोपीला अटक

यानंतर दौंड लोहमार्ग पोलीस आणि स्थानिक गुन्हे शाखेच्या संयुक्त पथकांची स्थापना करण्यात आली. एक पथक पुणे रेल्वे स्टेशनकडे तर दुसरे दौंड रेल्वे स्टेशनकडे रवाना झाले. रेल्वेमध्ये तपास सुरू असताना आरोपी इंद्रायणी एक्सप्रेसच्या बोगी क्रमांक डी-7, सीट क्रमांक 23 वर आढळून आला. तपास पथकातील पोलीस उपनिरीक्षक दयानंद शरणार्थी, पोहवा आनंद वाघमारे, पोलीस शिपाई मनोज म्हेत्रे, गोकुळ हिवाळे आणि संदीप उसरे यांनी अत्यंत शिताफीने आणि कोणत्याही प्रवाशास त्रास न होता आरोपीस ताब्यात घेतलं. आरोपीला पुणे रेल्वे स्टेशन येथे आणून पुढील कारवाईसाठी रायगड पोलिसांच्या ताब्यात देण्यात आलं आहे. ही संपूर्ण कारवाई पुणे लोहमार्ग पोलीस अधीक्षक अश्विनी सानप, अपर पोलीस अधीक्षक रोहीदास पवार आणि उपविभागीय पोलीस अधिकारी मनोजकुमार यादव यांच्या मार्गदर्शनाखाली पार पडली.
Alibag Crime : पहाटे ४.१५ वाजता तरूणी पोलीस स्टेशनला आली, लॉजवर घडलेलं सर्व काही सांगितलं, अलिबागमध्ये खळबळ

पैशांच्या वादातून मैत्रीचा शेवट रक्तरंजित हत्येत झाल्यानं ताम्हिणी घाट परिसरात भीतीचं वातावरण निर्माण झालं आहे. फरारी आरोपीच्या अटकेमुळे या हत्या प्रकरणाचा तपास वेग घेणार असून, इतर आरोपींची भूमिका व संपूर्ण कट उघड होण्याची शक्यता वर्तवली जात आहे.