नेमकी घटना काय?

सोमवारी, १२ जानेवारी २०२६ रोजी सायंकाळी नाशिकमधील सिडको भागातील शिवाजी चौक येथे मंत्री गिरीश महाजन यांची जाहीर सभा आयोजित करण्यात आली होती. या सभेमध्ये बोलताना महाजन यांनी नेहमीच्या आक्रमक शैलीत विरोधकांवर टीकास्त्र सोडले. भाषणादरम्यान त्यांनी काही ड्रग्ज पेडलर्ससोबतची एक व्हिडिओ क्लिप जाहीररीत्या दाखवली आणि विरोधकांचे ड्रग्ज माफियांशी संबंध असल्याचा खळबळजनक आरोप केला. महाजन यांच्या या आरोपांमुळे सभेत एकच खळबळ उडाली होती.

सभेनंतर ताफा अडवण्याचा प्रयत्न

सभा संपल्यानंतर साडेपाच-सहाच्या सुमारास मंत्री गिरीश महाजन आपल्या गाडीने रवाना होत होते. त्याचवेळी संशयित माधव पाटील (५२), त्यांचा मुलगा निशांत सुनील पाटील (२१) आणि एका महिलेने महाजन यांची गाडी अडवण्याचा प्रयत्न केला.

Nashik News: मोठी बातमी: मंत्री महाजनांना ‘अटकाव’ भोवला; सिडकोत राडा करणाऱ्या पिता-पुत्राविरोधात पोलिसांची मोठी कारवाई

“ए महाजन, आमच्या मुलांची खोटी क्लिप दाखवून खोटा प्रचार का करताय?” अशी विचारणा करत या तिघांनी मोठ्या प्रमाणावर आरडाओरड केली. अचानक झालेल्या या प्रकारामुळे पोलिसांची मोठी धावपळ उडाली. महाजन यांचा ताफा निघून गेल्यानंतरही या संशयितांनी शिवीगाळ करत गोंधळ घातल्याचे फिर्यादीत म्हटले आहे.

पोलीस कारवाई

या प्रकरणी पोलीस शिपाई केशव ढगे यांनी दिलेल्या फिर्यादीवरून अंबड पोलीस ठाण्यात गुन्हा दाखल करण्यात आला आहे. सरकारी कामात अडथळा आणणे, आरडाओरड करून शांतता भंग करणे आणि मंत्र्यांच्या ताफ्याला अटकाव करणे या कलमान्वये माधव पाटील, निशांत पाटील आणि संबंधित महिलेवर गुन्हा नोंदवण्यात आला आहे.

या घटनेमुळे सिडको परिसरात तणावाचे वातावरण निर्माण झाले होते. सध्या पोलीस या प्रकरणाचा अधिक तपास करत असून सभेच्या ठिकाणचे सीसीटीव्ही फुटेजही तपासले जाण्याची शक्यता आहे. निवडणुकीच्या काळात अशा प्रकारे मंत्र्यांच्या ताफ्याला लक्ष्य केल्याने नाशिक पोलीस आता अधिक सतर्क झाले आहेत.