सुशील राऊत, छत्रपती संभाजीनगर: पहिल्या पतीच्या मृत्यूनंतर विम्याच्या स्वरूपात मिळालेल्या ८० लाख रुपयांच्या रकमेवर डोळा ठेवून, दुसऱ्या पतीसह सासरच्या नातेवाईकांनी केलेल्या छळाला कंटाळून एका सहा महिन्यांच्या गरोदर विवाहितेने गळफास घेऊन आत्महत्या केली. ही धक्कादायक घटना उघडकीस आली असून याप्रकरणी वाळूज एमआयडीसी पोलीस ठाण्यात पतीसह पाच जणांविरुद्ध आत्महत्येस प्रवृत्त केल्याचा गुन्हा दाखल करण्यात आला आहे.
पल्लवी गोपाल सहाने (वय ३०, रा. स्वास्तिक सिटी, वडगाव कोल्हाटी) असे मृत विवाहितेचे नाव आहे. पल्लवीचा पहिला विवाह २०१५ मध्ये झाला होता, मात्र २०२१ मध्ये पहिल्या पतीचा अपघाती मृत्यू झाला. त्यानंतर ती आपल्या सहा वर्षांच्या मुलीसह माहेरी राहत होती. पल्लवीचे कुटुंबीयांनी १२ जुलै २०२४ रोजी गोपाल सहाने याच्याशी तिचे दुसरे लग्न लावून दिले. लग्नात ३ लाख रुपये हुंडा आणि ५ ग्रॅम सोन्याची अंगठी देण्यात आली होती. दरम्यान, सप्टेंबर २०२४ मध्ये पल्लवीला पहिल्या पतीच्या विम्याचे ८० लाख रुपये मिळाल्याचे समजताच पती गोपालने ट्रॅक्टर आणि चारचाकी वाहनासाठी सुमारे ११ लाख रुपये घेतले. त्यानंतर घरासाठी तगादा लावत पल्लवीच्या खात्यातून आतापर्यंत ३० ते ३५ लाख रुपये काढून घेतल्याचे फिर्यादीत म्हटले आहे. पल्लवी सहा महिन्यांची गरोदर असतानाही तिला पैशांसाठी वारंवार मारहाण केली जात होती.
सहा वर्षांच्या मुलीने सांगितला आईवर होणारा अन्याय
केवळ पतीच नव्हे, तर सासरच्या इतर नातेवाईकांनीही पैशांच्या हव्यासापोटी पल्लवीचा छळ मांडला होता. नणंद सीमाच्या लग्नासाठी २० लाखांची मागणी करून तिला १० लाख रुपये देण्यास भाग पाडले, तर दुसरी नणंद अर्चना जाधव आणि तिचा पती किशोर जाधव यांनी घर बांधण्यासाठी २० लाख रुपयांची जबरदस्तीने मागणी केली. पल्लवीवर होणाऱ्या या अन्यायाबाबत तिची सहा वर्षांची मुलगी इंद्रायणी हिने आपल्या आजीला वारंवार माहिती दिली होती. अखेर १२ जानेवारी रोजी झालेल्या मारहाणीनंतर आणि सततच्या जाचाला कंटाळून पल्लवीने मंगळवारी सकाळी ८ वाजेच्या सुमारास ओढणीने गळफास घेतला. आई गोदावरी घोपटे यांच्या तक्रारीवरून पती गोपाल सहाने, नणंद कविता चिकटे, अर्चना जाधव, नणंदोई किशोर जाधव आणि दीर समाधान चिकटे यांच्याविरुद्ध पोलिसांनी गुन्हा नोंदवला आहे.