मुंबईत येत्या १५ जानेवारी रोजी २२७ वॉर्डात मतदान होणार आहेत. या निवडणुकीची जबाबदारी मुंबई महानगरपालिकेवर असणार असून पालिकेकडून या निवडणुकीसाठी २३ निवडणूक निर्णय अधिकाऱ्यांची नियुक्ती करण्यात आली आहे. या प्रत्येकी २३ निवडणूक निर्णय अधिकाऱ्यांच्या देखरेखीखाली काही वॉर्डांची जबाबदारी देण्यात आली आहे. या निवडणूक अधिकाऱ्यांच्या अखत्यारित असणाऱ्या वॉर्डांची मतमोजणी येत्या १६ जानेवारी आयोजित करण्यात आली असून निवडणूक अधिकारी कार्यालयात ही मतमोजणी पूर्ण केली जाणार आहे.
साधारण या कार्यालयात असणाऱ्या पाच ते सहा वॉर्डांची मतमोजणी एकाचवेळी सुरू करण्याची मागणी राजकीय पक्षांकडून यापूर्वीच केली होती. मात्र निवडणूक आयोगाने राजकीय पक्षांची ही मागणी फेटाळून लावली आहे. प्रत्येक निवडणूक निर्णय अधिकारी कार्यालयात क्रमवारीनुसार वॉर्डाची मोजणी सुरू करण्यात येणार आहे. त्यानुसार एका वॉर्डाची मतमोजणी पूर्ण झाल्यानंतर दुसऱ्या वॉर्डाची मोजणी सुरू करण्यात येणार असल्याचे कळते. त्यामुळे अनेक वॉर्डाचा निकाल हाती येण्यास विलंब होण्याची शक्यता आहे. त्यामुळे अनेक ठिकाणी वॉर्डात उमेदवारांना निकालासाठी वाट पहावी लागणार असल्याने राजकीय पक्षांनी याविरोधात आयोगाकडे नाराजी व्यक्त केल्याचे कळते. या संदर्भात निवडणूक आयोगाकडे पुन्हा एकदा राजकीय पक्षांकडून दाद मागितली जाण्याची शक्यता वर्तविण्यात येत असून सोमवारी याबाबत बैठक घेतली जाण्याची शक्यता सूत्रांनी वर्तवली.
मतमोजणी नेमकी कशी होणार ?
मुंबई महानगरपालिकेच्या ए, बी आणि सी वॉर्डासाठी निवडणूक निर्णय अधिकाऱ्यांची नेमणूक करण्यात आली आहे. या अंतर्गत २०७ ते २२७ वॉर्डाची मतमोजणी केली जाणार आहे. ही मतमोजणी एकाचवेळी सर्व वाँडाँची न करता, प्रथम २०७ क्रमांकाच्या वॉर्डाची मतमोजणी सुरू होईल. ती पूर्ण झाल्यानंतर २०८ क्रमाकांच्या वॉर्डाची मतमोजणी सुरू करण्यात येईल. त्यामुळे अखेरच्या वॉर्डाच्या निकालासाठी विलंब होण्याची शक्यता आहे.