महाराष्ट्र साहित्य परिषदेची शाहूपुरी शाखा आणि आणि मावळा फाउंडेशनच्या वतीने आयोजित अखिल भारतीय मराठी साहित्य महामंडळाच्या ९९ व्या अखिल भारतीय मराठी साहित्य संमेलनाचे उद्घाटन ख्यातनाम लेखिका, विचारवंत डॉ. मृदुला गर्ग यांच्या हस्ते झाले. ९९ व्या साहित्य संमेलनाचे अध्यक्ष विश्वास पाटील, ९८ व्या साहित्य संमेलनाच्या अध्यक्ष डॉ. तारा भवाळकर, ग्रामविकासमंत्री जयकुमार गोरे, भारती विद्यापीठाचे कुलपती डॉ. शिवाजीराव कदम, स्वागताध्यक्ष शिवेंद्रसिंहराजे भोसले, साहित्य महामंडळाचे अध्यक्ष प्रा. मिलिंद जोशी, प्रमुख कार्यवाह सुनीताराजे पवार, कार्याध्यक्ष विनोद कुलकर्णी उपस्थित होते. स्नेहल दामले यांनी सूत्रसंचालन केले.
‘मी मुख्यमंत्री असताना साहित्यात राजकारण नाही, साहित्यिकांनी राजकारणात जरूर यावे, पण…’ फडणवीसांचे वक्तव्य चर्चेत

‘मावशीचे कोडकौतुक नको’

‘मायमराठीची अवहेलना होत असताना मावशीचे कोडकौतुक सहन करू शकत नाही. महाराष्ट्रात मराठी भाषेचीच सक्ती असायला हवी. नव्या शैक्षणिक धोरणाशी विसंगत हिंदी भाषा सक्तीचा निर्णय राज्य सरकारने कायमचा रद्द करावा,’ अशी मागणी प्रा. जोशी यांनी केली. ‘यापुढील काळात मराठी भाषा आणि साहित्य विकसित करण्यासाठी आताच्या पिढीचा पाया मजबूत करणे आवश्यक आहे. त्यासाठी आपण काही करणार आहोत का, असा सवाल करून भवाळकर यांनी ‘लहान वयात मुलांवर अनेक भाषांचे दडपण नको,’ अशा कानपिचक्या दिल्या.
मोठी बातमी: साताऱ्यातील अखिल भारतीय मराठी साहित्य संमेलनावर बहिष्कार, संमेलनापूर्वीच उफाळला मोठा वाद!
त्यावर मुख्यमंत्री फडणवीस यांनी, ‘महाराष्ट्रात केवळ मराठीची सक्ती असेल,’ असा खुलासा केला. ‘महाराष्ट्रात मराठी भाषा वगळता अन्य कोणत्याही भाषेची सक्ती नाही. कोणत्या वर्गापासून अन्य भाषा शिकवायची याचा विचार करण्यासाठी नेमलेल्या डॉ. नरेंद्र जाधव समितीचा अहवाल अंतिम टप्प्यामध्ये आहे. अभिजात भाषेचा दर्जा मिळाल्यानंतर मराठीला आता भारतात लोकमान्यता मिळवून देण्याचे काम आपल्याला करायचे आहे,’ असे त्यांनी सांगितले.

‘देव्हाऱ्यात विठोबासमवेत ज्ञानेश्वर आणि तुकारामांच्या प्रतिमा टिकाव्यात असे वाटत असेल, तर वेळीच जागे व्हा. तुमच्या खांद्यावर झेंडा कोणत्याही जातीचा, पक्षाचा वा धर्माचा असला तरी दांडा मराठीचा असायला हवा. खांद्यावर पालखी कोणाचीही असली तरी तिचा गोंडा मराठीच असायला हवा,’ असे खडे बोल विश्वास पाटील यांनी सुनावले. ‘महाराष्ट्रात पुस्तकांची केवळ ३६ दुकाने आहेत. वीस जिल्ह्यांत पुस्तकांचे दुकान नाही. बस आणि रेल्वे स्थानकांवर पुस्तक आणि वर्तमानपत्र विक्री दुकानांचे भाडे वाढवून तिथे मिठाईची दुकाने थाटण्यात आली आहेत. ही दुकाने हटवून पुस्तकाची दुकाने सुरू करा, अशी मागणी त्यांनी केली.