नेमकं काय घडलं?

प्रभाग क्रमांक ३१ मधील भाजपचे अधिकृत उमेदवार बाळकृष्ण शिरसाट हे निवडणूक निर्णय अधिकाऱ्यांच्या कार्यालयात उपस्थित होते. याच वेळी, याच प्रभागातून इच्छुक असलेले पण उमेदवारी न मिळाल्याने नाराज झालेले देवानंद बिरारी आणि वंदना बिरारी हे आपला अर्ज मागे घेण्यासाठी तिथे पोहोचले. यावेळी दोन्ही बाजूने एकमेकांकडे बघून खुन्नस देण्यात आली. सुरुवातीला शाब्दिक चकमक उडाली, पण पाहता पाहता वादाचा पारा इतका चढला की, भर कार्यालयात शिरसाट आणि बिरारी यांच्यात एकमेकांवर लाथाबुक्क्यांची बरसात सुरू झाली.

पोलिसांची धावपळ अन् गोंधळ

भाजपच्या दोन बड्या पदाधिकाऱ्यांमधील ही हाणामारी पाहून तिथे उपस्थित असलेले अधिकारी आणि कार्यकर्ते अवाक झाले. अखेर पोलिसांनी मध्यस्थी करत दोन्ही गटांना एकमेकांपासून वेगळे केले. मात्र, या घटनेने भाजपमधील अंतर्गत गटबाजी आणि तिकीट वाटपावरून असलेला असंतोष चव्हाट्यावर आला आहे.

Rahul Narvekar: ‘पंगा कशाला घेताय?’; विधानसभा अध्यक्षांची माजी खासदाराला थेट धमकी? राऊतांनी शेअर केला खळबळजनक व्हिडिओ

एकही मत पडू देणार नाही; बिरारींचा इशारा

या राड्यानंतर देवानंद बिरारी यांनी अत्यंत आक्रमक पवित्रा घेतला. “बाळकृष्ण शिरसाट यांना प्रभागात एकही मत पडू देणार नाही,” असा थेट इशारा त्यांनी दिला आहे. तर दुसरीकडे, वंदना बिरारी यांनी थेट अंबड पोलीस ठाणे गाठून शिरसाट यांच्या विरोधात तक्रार दाखल केली आहे. पोलिसांनी या प्रकरणाचा तपास सुरू केला असून, निवडणुकीच्या तोंडावर कार्यकर्त्यांमधील ही हाणामारी भाजपसाठी मोठी डोकेदुखी ठरणार आहे.

नाशिकच्या राजकीय वर्तुळात आता एकच चर्चा आहे बाहेरून शिस्तबद्ध दिसणाऱ्या भाजपच्या ‘भात्यात’ ही कसली बाण सुटतायत? उमेदवारीवरून झालेला हा वाद निवडणुकीच्या निकालात भाजपला महागात पडणार का, हे पाहणे महत्त्वाचे ठरणार आहे.