समाधानकारक जागावाटप न झाल्याने अनेक महापालिकांमध्ये महायुती आणि आघाडी फिस्कटली आहे. पुणे आणि पिंपरी -चिंचवड महापालिकेत भाजपने युती करण्यास नकार दिल्याने राष्ट्रवादी काँग्रेस अजित पवार गटाने या दोन्ही ठिकाणी शरद पवार गटाला सोबत घेतले आहे. मुंबईत शरद पवारांच्या राष्ट्रवादीने शिवसेना (उबाठा) आणि महाराष्ट्र नवनिर्माण सेनेशी युती केली आहे. मुंबई, पुणे, पिंपरी-चिंचवड आणि परभणी वगळता शरद पवार गटाने काँग्रेस आणि शिवसेना ठाकरे गटासोबतची आघाडी कायम ठेवली.

ठाण्यात काय घडलं?

ठाणे महापालिकेची निवडणूक स्वबळावर लढण्याची घोषणा काँग्रेसच्या ठाण्यातील नेत्यांनी केल्यानंतर आता शिवसेना (उबाठा), राष्ट्रवादी काँग्रेस (शप) आणि महाराष्ट्र नवनिर्माण सेना एकत्र निवडणूक लढवणार असल्याचे संकेत आहेत. या तीन पक्षांतील जागावाटपानुसार ‘उबाठा’ला सर्वाधिक ६२ जागा देण्यात आल्याचे समजते. राष्ट्रवादी काँग्रेस (शप) पक्षाच्या वाट्याला आलेल्या ४५ जागांपैकी काही जागांवरील राष्ट्रवादीचे उमेदवार शिवसेनेच्या मशाल चिन्हावर निवडणूक लढवणार आहेत. तर, मनसेला २४ जागा देण्यात आल्याचे समजते. मात्र, मनसेच्या २८ उमेदवारांनी अर्ज दाखल केले आहेत.

मुंबईत शेवटच्या क्षणापर्यंत गोंधळ

मुंबई महापालिका निवडणुकीसाठी अर्ज भरण्याचा अखेरचा दिवस मंगळवारी गोंधळ, धावपळीचा ठरला. शेवटच्या दिवसापर्यंत पक्षांमध्ये सुरू असलेल्या वाटाघाटींमुळे उमेदवारांना एबी फॉर्म अर्ज दाखल करण्याच्या काही तास आधी मिळाल्याने त्यांना अक्षरशः धावत निवडणूक अधिकाऱ्यांचे कार्यालय गाठावे लागले. पक्षाकडून अखेरपर्यंत उमेदवारी न मिळाल्याने इच्छुकांनी अपक्ष म्हणूनही अर्ज दाखल केले आहेत. बुधवारी या दाखल अर्जांची छाननी होणार असून त्यानंतर पालिकेच्या निवडणूक रिंगणातील उमेदवार ठरतील.