सदर प्रकरणामध्ये मिळालेल्या माहितीनुसार, संबंधित तरुण रात्री उशिराच्या सुमारास वाईनशॉपसमोर आला. तो पूर्णपणे मद्यधुंद अवस्थेत असल्याने त्याचे वर्तन आक्रमक होते. काही क्षणातच त्याने दुकानात प्रवेश करत लाकडी बांबूच्या सहाय्याने नामफलक, काचा तसेच दुकानातील साहित्याची जोरदार तोडफोड सुरू केली. या दरम्यान तरुण मोठ्याने ओरडत शिवीगाळ करत असल्याने परिसरात एकच गदारोळ माजला. रस्त्यावरून जाणाऱ्या नागरिकांनी हा प्रकार पाहताच घटनास्थळी गर्दी केली.

परिस्थिती नियंत्रणाबाहेर जात असल्याचे लक्षात येताच स्थानिक नागरिक आणि व्यापाऱ्यांनी हस्तक्षेप केला. यावेळी संतप्त नागरिकांनी धाव घेत मद्यधुंद तरुणाला रोखण्याचा प्रयत्न केला. मात्र तो अधिकच उग्र होत असल्याने अखेर नागरिकांनी त्याला चोप देत ताब्यात घेतले. त्यानंतर तात्काळ खारघर पोलिसांना घटनेची माहिती देण्यात आली.

Solapur Crime : ज्याला ‘खास मित्र’ मानलं, त्यानेच… तृतीयपंथी उमेदवाराच्या हत्येचं गूढ उकललं

संबंधित घटनेची माहिती मिळताच खारघर पोलिसांनी घटनास्थळी धाव घेतली. तसेच या तरुणाला आपल्या ताब्यात घेतले. पोलिसांनी त्याची वैद्यकीय तपासणी करून त्याच्याविरोधात सार्वजनिक शांतता भंग , मालमत्तेची तोडफोड तसेच दारूच्या नशेत गोंधळ घालणे यासंदर्भात गुन्हा दाखल केला आहे. या प्रकरणाचा पुढील तपास सुरू असून तरुणाने हा प्रकार नेमका का केला, याचा शोध पोलिस घेत आहेत.

या घटनेमुळे खारघर परिसरातील व्यापारी व नागरिकांमध्ये तीव्र नाराजी व्यक्त केली जात आहे. रात्रीच्या वेळी अशा प्रकारच्या घटना घडत असल्याने सुरक्षिततेचा प्रश्न ऐरणीवर आला आहे. मद्यधुंद अवस्थेत सार्वजनिक ठिकाणी गोंधळ घालणाऱ्यांवर पोलिसांनी कठोर कारवाई करावी, अशी मागणी स्थानिक नागरिकांकडून करण्यात येत आहे.