मिळालेल्या माहितीनुसार, पवन काळे यांनी बीड येथील राहत्या घरी गळफास घेऊन आपल्या आयुष्याची अखेर केली. ही बाब लक्षात येताच कुटुंबीयांना मोठा धक्का बसला. घटनेची माहिती मिळताच परिसरातील नागरिकांनी घरासमोर मोठी गर्दी केली होती. घटनेचं गांभीर्य ओळखून शिवाजीनगर पोलीस ठाण्याचे पथक तातडीने घटनास्थळी दाखल झाले. पोलिसांनी पंचनामा करून मृतदेह उत्तरीय तपासणीसाठी बीडच्या शासकीय रुग्णालयात पाठवला आहे.

वडिलांच्या विजयात मोलाचा वाटा

पवन यांचे वडील अशोक काळे हे नुकत्याच झालेल्या निवडणुकीत राष्ट्रवादी काँग्रेस (शरदचंद्र पवार गट) कडून ‘तुतारी’ या चिन्हावर निवडून आले आहेत. वडिलांच्या या विजयामध्ये पवन यांचा मोठा वाटा होता. त्यांनी तरुणांची मोठी फळी उभी करून घरोघरी जाऊन प्रचार केला होता. पवन यांचा स्वभाव अत्यंत मनमिळाऊ आणि सामाजिक कार्याची आवड असलेला होता, त्यामुळे मित्रपरिवारात ते अत्यंत लोकप्रिय होते.
Crime News: पप्पा नसताना तीन काका घरी यायचे अन्…; 10 वर्षांच्या लेकीने केला आईच्या भयंकर कृत्याचा उलगडा

या टोकाच्या निर्णयामागील कारण अद्याप अस्पष्ट

पवन काळे यांच्यासारख्या मनमिळाऊ तरुणाने इतकं टोकाचे पाऊल का उचललं, याचं कारण अद्याप समजू शकलेलं नाही. त्यांच्याकडे कोणतीही चिठ्ठी सापडली आहे का किंवा यामागे काही कौटुंबिक वा वैयक्तिक तणाव होता का, याचा तपास पोलीस करत आहेत.

घटनेने परिसरात हळहळ

ऐन उमेदीच्या काळात आणि वडिलांच्या राजकीय यशाच्या आनंदात असतानाच पवन यांनी जीवन संपवल्याने काळे कुटुंबावर दुःखाचा डोंगर कोसळला आहे. त्यांच्या निधनाची बातमी समजताच राजकीय आणि सामाजिक क्षेत्रातील मान्यवरांनी शोक व्यक्त केला असून काझीनगर परिसरात हळहळ व्यक्त केली जात आहे.