राज्यभर गाजलेल्या सक्षम ताटे खून प्रकरणात आज एक धक्कादायक घटना घडली. सक्षमची प्रेयसी आचल मामीडवार आणि सक्षमची आई यांनी नांदेडच्या जिल्हाधिकारी कार्यालयासमोर अंगावर ज्वलनशील पदार्थ ओतून आत्मदहनाचा प्रयत्न केला. मात्र, तिथे उपस्थित असलेल्या पोलीस कर्मचाऱ्यांनी वेळीच त्यांना अडवले आणि मोठा अनर्थ टळला. या घटनेनंतर आचल मामीडवार आणि सक्षम ताटेच्या कुटुंबासोबत पोलिसांमध्ये वाद आणि धक्काबुक्की झाली.

सक्षमच्या हत्येची घटना 27 नोव्हेंबर रोजी नांदेड शहरातील जुनागंज भागात घडली होती. हे आंतरजातीय प्रेम प्रकरण होते. प्रेम प्रकरणातून आचल मामीडवारच्या वडिलांनी आणि भावांनी आल्या सहकाऱ्यां सोबत मिळून सक्षमची हत्या केली होती. या प्रकरणात सर्व आरोपींना अटक करण्यात आली आहे.

Pune Politics : प्रशांत जगताप यांचा राजकीय बॉम्ब, शरद पवारांच्या पक्षाला रामराम, पण निवडणूक लढणार असल्याची घोषणा

मात्र, आचलचा आरोप आहे की, घटनेच्या दिवशी इतवारा पोलीस ठाण्यातील पोलीस कर्मचारी माही दासरवाड आणि धीरज कोमूलवाड यांनी आचलच्या अल्पवयीन भावाला सक्षमची हत्या करण्यासाठी चिथावणी दिली होती. आचलच्या म्हणण्यानुसार, हे पोलीस कर्मचारी म्हणाले होते की, “सक्षम तुझ्या बहिणीला रोज घेऊन फिरतो आधी त्याला मारणे नंतर पोलीस स्टेशनला ये.”

या पोलीस कर्मचाऱ्यांवर कारवाई करण्याच्या मागणीसाठी आचल मामीडवार आणि सक्षम ताटेच्या कुटुंबीयांनी वरिष्ठ अधिकाऱ्यांची भेट घेतली होती. त्यांनी जिल्हाधिकारी, पोलीस अधीक्षक आणि विशेष पोलीस महानिरीक्षक यांना निवेदन देऊन या पोलिसांवर कारवाई करण्याची मागणी केली होती. त्यांनी आत्मदहनाचा इशाराही दिला होता.

मात्र, आजपर्यंत या मागणीवर कोणतीही कारवाई झाली नसल्याने, आज आचल मामीडवार आणि सक्षम ताटेच्या आईने जिल्हाधिकारी कार्यालयासमोर आत्मदहनाचा प्रयत्न केला. त्यांनी पुन्हा एकदा इशारा दिला आहे की, “आजच कारवाई झाली नाही तर पुन्हा आम्ही आमचे जीवन संपवू.” या घटनेमुळे परिसरात तणावाचे वातावरण निर्माण झाले आहे. पोलीस या प्रकरणाचा तपास करत आहेत.