निवडणूक कार्यालयाने उमेदवारांसाठी मंडप, ध्वज, बॅनर्स, प्रचार साहित्यासह वाहतूक, कार्यकर्त्यांचे चहापान आदी खर्चाचे दरपत्रक जाहीर केले आहे. चहासाठी १०, कॉफीसाठी १२, तर शाकाहारी जेवणासाठी १५० आणि मांसाहारी जेवणासाठी २५० रुपये दर निश्चित करण्यात आले आहेत. नाशिक महापालिका निवडणुकीसाठी राज्य निवडणूक आयोगाच्या निर्देशांनुसार राजकीय पक्षांच्या प्रतिनिधींची बैठक महापालिका मुख्यालय राजीव गांधी भवनात घेण्यात आली. यावेळी निवडणूक खर्चमर्यादेविषयी माहिती देताना विविध खर्चांचे दरपत्रक निश्चित करण्यात आल्याची माहिती महापालिकेचे मुख्य लेखापरीक्षक बळवंत गायकवाड यांनी दिली.

हाय सिक्युरिटी, उंच भिंती तरीही ‘माल’ पोहचलाच! नाशिक रोड जेलमध्ये नेमकं चाललंय काय? खळबळजनक खुलासा
प्रचारासाठी उमेदवारांकडून कार्यकर्त्यांच्या चहापान व भोजनावर होणारा खर्चही निवडणूक खर्चात समाविष्ट राहणार आहे. या दरपत्रकानुसार चौकसभा व पथनाट्याकरिता २५० रुपये परवाना शुल्क आकारले जाईल. महापालिकेच्या जागेवर हेलिपॅड परवानगीसाठी एका दिवसाकरिता ७०० रुपये व त्यावर वस्तू व सेवाकर १८ टक्के आकारला जाईल. दरात तफावत आढळल्यास कारवाईचा इशारा देण्यात आला आहे.

फलक ३००, तर बॅनर १२ रुपये
खासगी मालमत्ता व प्रचार कार्यालयाच्या जागेवर प्रचार साहित्य लावण्यासाठी ५० ते १०० चौरस फुटांपर्यंत कापडी बॅनर, फलक लावण्यासाठी ३०० रुपये, बूथ परवानगीसाठी पाच बाय पाच आकाराच्या बूथसाठी २५०, तर दहा बाय दहा फुटांसाठी १००० रुपये दर आकारला जाणार आहे.

सभांसाठीचे दर…
महापालिकेच्या मैदानांवर जाहीर सभांकरिता ७ पैसे प्रतिचौरस फुटांप्रमाणे दर आकारले जाणार आहेत. यात पवननगर मैदानाकरिता ५ हजार, पाटीलनगर, सिडको १० हजार, शिवाजी चौक ७ हजार, य. म. पटांगण पंचवटी ५ हजार, राजे संभाजी स्टेडियम २५ हजार, शिखरेवाडी मैदान, सातपूर क्लब हाउस मैदानासाठी २० हजार, मनपा शाळा क्रमांक ५७ मैदान १५ हजार रुपये, तर ईदगाह व अनंत कान्हेरे मैदानावरील जाहीर सभेसाठी ३५ हजार रुपये शुल्क आकारले जाणार आहे.

Devyani Farande: भ्रमात राहू नका, कोणाचीही उमेदवारी ‘फिक्स’ नाही; आमदार फरांदेंचा स्वकियांना इशारा
.. असे पदार्थ, असे दर
चहा दहा रुपये, कॉफी १२ रुपये, पाण्याची बाटली २० रुपये, बिस्कीट ५ रुपये, वडापाव १२ रुपये, भाजी १५ रुपये, पोहे २० रुपये, डोसा ४० रुपये, पावभाजी, मिसळपाव ६५ रुपये, शाकाहारी जेवणासाठी १५० रुपये, तर मांसाहारी जेवणासाठी २५० रुपये दर निश्चित करण्यात आले असून, त्यानुसार दैनंदिन खर्च सादर करणे उमेदवारांवर बंधनकारक राहणार असल्याचे यावेळी जाहीर करण्यात आले.

लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा