म. टा. विशेष प्रतिनिधी, नाशिक: महापालिका निवडणुकांसाठी भाजपने मुलाखतीचा पहिला टप्पा पार करून रणसंग्रामची तयारी सुरू केली असतानाच, पक्षातील गटबाजी उफाळून आली आहे. महिनाभरापूर्वी नाशिक महापालिका निवडणूक प्रमुख पदावर नियुक्त केलेले आमदर राहुल ढिकले यांना हटवत, भाजपने आमदार देवयानी फरांदे यांना नाशिकचे कॅप्टन केले आहे. सेमिफायनलमध्ये भाजपने अचानक कॅप्टन बदलल्यामुळे राजकीय वर्तुळात खळबळ उडाली आहे.
नाशिक महापालिकेत भाजपने शंभर प्लसचा नारा दिला आहे. निवडणुकांचा कार्यक्रम जाहीर झाल्यानंतर भाजपने महापालिका ताब्यात ठेवण्यासाठी आपली सर्व ताकद पणाला लावली आहे. त्यासाठी नाशिकचे प्रभारी म्हणून संकटमोचक कुंभमेळामंत्री महाजन यांच्याकडे सोपवली. पाठोपाठ महापालिकेच्या निवडणूक प्रमुखपदी आमदार ढिकलेंची नियुक्ती केली होती.
Manikrao Kokate: माणिकराव कोकाटे भाजपच्या चक्रव्यूहात; तो एक मुद्दा अडचणीचा ठरला अन् स्वत:च अडकले, आता राजकीय भविष्य…
शहरातील फरांदे, सीमा हिरे या सीनिअर आमदारांना डावलून भाजपने ढिकलेंवर जबाबदारी टाकली होती. त्यामुळे नाशिकच्या राजकारणात ढिकलेंचे महत्त्व वाढले होते. त्यानंतर भाजपने इच्छूक ९७० जणांच्या मुलाखतीचा कार्यक्रम आटोपला आहे. आता अचानक कॅप्टन बदलून भाजपसह विरोधक बुचकळ्यात पडले आहेत.
‘त्या’ वक्तव्याने झाला कार्यक्रम
महापालिका निवडणुकांच्या तोंडावर एका उद्घाटन कार्यक्रमात आमदार ढिकले यांनी पक्षांतर्गत विरोधकांवर शरसंधान साधले होते. ‘आजारी असतानाही माझ्या विरोधात ज्यांनी काम केले, माझी रॅली अडवली, त्यांना अस्मान दाखविल्याशिवाय राहणार नाही. ढाक लावून अस्मान नाही दाखवलं तर ढिकले नाही, असा इशारा पक्षांतर्गत विरोधकांना जाहीर व्यासपीठावरून दिला होता. निवडणूकप्रमुखच इशारा देत असल्याचे आयते कोलित विरोधकांना मिळाले. त्यामुळे भाजपचे संकटमोचक महाजन यांनी पहिलवान ढिकलेंनाच अस्मान दाखविल्याची चर्चा भाजपमध्ये सुरू आहे.
‘मुख्यमंत्री देवेंद्र फडणवीस, प्रदेशाध्यक्ष आमदार चव्हाण, कुंभमेळामंत्री गिरीश महाजन यांच्या मार्गदर्शनाखाली पक्षाच्या सर्व पदाधिकाऱ्यांना सोबत घेऊन महापालिका निवडणुकीत पक्षाला यश मिळवून देऊ,’प्रा. देवयानी फरांदे, आमदार, नाशिक मध्य.
कोकाटेंना कोणत्याही क्षणी अटक होण्याची शक्यता, नाशिक पोलिसांचं पथक मुंबईकडे निघालं
‘भाजप, तसेच मुख्यमंत्री देवेंद्र फडणवीस यांच्या आदेशानुसार जी जबाबदारी दिली जाईल, ती पार पाडू. आमदार फरांदे यांच्या नेतृत्वाखाली काम करू,’ अॅड. राहुल ढिकले, आमदार, नाशिक पूर्व
लेखकाबद्दलसानिया कदमसानिया कदम, मटा ऑनलाईनमध्ये कन्सल्टंट पदावर कार्यरत आहे. प्रामुख्याने क्राइम, सिव्हिक आणि पॉलिटिक्स या बातम्या कव्हर करते. याआधी सहा महिने महाराष्ट्र टाइम्स प्रिंटमध्ये कॉलेज क्लब रिपोर्टर म्हणून काम केले आहे. त्या काळात कॉलेज इव्हेंट्स, शैक्षणिक उपक्रम आणि सोशल मीडियावरील ट्रेंड्सवर बातम्या केल्या. मुलुंड वाणिज्य महाविद्यालयातून BMM मध्ये पदवी घेतल्यानंतर सध्या के.सी. महाविद्यालयात MA in Communication and Journalism करत आहे. इंटरनॅशनल घडामोडी आणि पॉप कल्चर हे विषय विशेष आवडीचे असून इंग्लिश आणि मराठी या दोन्ही भाषेत वाचन व लेखन करण्याची आवड आहे.… आणखी वाचा