सकाळी सव्वा नऊच्या सुमारास अहिल्यानगर जिल्हाधिकारी कार्यालय येथे बॉम्बस्फोटाची धमकी देणारा मेल प्राप्त झाला. माहिती मिळताच प्रशासनाने त्वरित हालचाली सुरू केल्या. तोफखाना पोलीस, बॉम्ब शोधक पथक आणि श्वान पथक जिल्हाधिकारी कार्यालय परिसरात दाखल झाले असून सहा मजली इमारतीची सखोल तपासणी सुरू करण्यात आली आहे. कार्यालयातील प्रत्येक मजला, प्रवेशद्वार, पार्किंग परिसर तसेच आजूबाजूचा भाग बारकाईने तपासला जात आहे.

या घटनेनंतर जिल्हाधिकारी कार्यालय परिसरात पोलिसांचा कडेकोट बंदोबस्त तैनात करण्यात आला आहे. संशयास्पद हालचालींवर करडी नजर ठेवण्यात येत असून, कार्यालयातील कर्मचारी, अधिकारी तसेच नागरिकांमध्ये काही काळ तणावाचे वातावरण निर्माण झाले होते. मात्र प्रशासनाने तत्काळ उपाययोजना राबवून परिस्थिती नियंत्रणात ठेवली आहे.

Dharashiv News: धाराशिव हादरलं! कळंब तालुक्यात ३६ वर्षीय तरुणाने भर चौकात जीवन संपवलं, नेमकं काय घडलं?

दरम्यान, धमकीचा मेल नेमका कोणी पाठवला आणि त्यामागचा उद्देश काय आहे, याचा तपास सायबर पथक व पोलिसांकडून युद्धपातळीवर सुरू आहे. मेल कुठून आणि कोणत्या आयडीवरून पाठवण्यात आला, याचा तांत्रिक तपास केला जात असून संबंधित सर्व डिजिटल पुरावे गोळा केले जात आहेत.

या संदर्भात माहिती देताना पोलिस अधिक्षक सोमनाथ घार्गे यांनी सांगितले की, जिल्हाधिकारी कार्यालय बॉम्बने उडवून देण्याची धमकी देणारा मेल सकाळी सव्वा नऊ वाजता प्राप्त झाला. त्यानंतर पोलिस प्रशासन तात्काळ अलर्ट झाले. तोफखाना पोलीस व बॉम्ब शोध पथकाने सहा मजली इमारतीची तपासणी सुरू केली असून, मेल कुठून आला याचा तपास सायबर पोलीस करत आहेत.

प्रशासनाने नागरिकांना अफवांवर विश्वास न ठेवण्याचे आवाहन केले असून, परिस्थिती पूर्णपणे नियंत्रणात असल्याचे स्पष्ट केले आहे. तपास पूर्ण होईपर्यंत सुरक्षा व्यवस्था कायम ठेवण्यात येणार असल्याचेही प्रशासनाकडून सांगण्यात आले आहे.