म. टा. प्रतिनिधी, पुणे: झपाट्याने वाढणारे नागरीकरण, शहराचा भौगोलिक विस्तार आणि गुन्हेगारीचे बदलते स्वरूप लक्षात घेऊन, पुण्यातील कायदा-सुव्यवस्था आणखी सक्षम करण्यासाठी पाच नवीन पोलिस ठाण्यांसह दोन परिमंडळांच्या निर्मितीचा प्रस्ताव राज्य सरकारने रविवारी मंजूर केला. तीन पोलिस उपायुक्त व सहा सहायक आयुक्तांची पदेही मंजूर करण्यात आली असून, अतिरिक्त ८३० पोलिस शिपायांची कुमक पुणे पोलिसांना उपलब्ध करून देण्याचा निर्णय घेण्यात आला.
विमानतळ पोलिस ठाण्यातून लोहगाव, सिंहगड रस्ता पोलिस ठाण्यातून नऱ्हे, येरवडा पोलिस ठाण्यातून लक्ष्मीनगर, कोंढवा पोलिस ठाण्यातून येवलेवाडी आणि हडपसर पोलिस ठाण्यातून मांजरी या पोलिस ठाण्यांची निर्मिती केली जाणार आहे. त्यानंतर पुणे शहरातील पोलिस ठाण्यांची संख्या ४४वर पोहोचेल. आहे. शहरात सध्या पाच परिमंडळे असून, त्यामध्ये आता नवीन दोन परिमंडळांची भर पडून ती सात होणार आहेत.
शहरात गेल्या काही वर्षांत लोकसंख्या मोठ्या प्रमाणात वाढली असून, गुन्हेगारीवर नियंत्रण, वाहतूक शिस्त आणि कायदा-सुव्यवस्था राखण्यासाठी पुणे पोलिस दलाच्या विस्ताराची आवश्यकता होती. त्या पार्श्वभूमीवर पोलिस आयुक्त अमितेशकुमार यांनी पाच नवीन पोलिस ठाणी, दोन नवीन परिमंडळांची निर्मिती आणि अतिरिक्त मनुष्यबळ मिळण्यासाठी गृह व वित्त विभागाकडे प्रस्ताव सादर केला होता; तर परिमंडळ निर्मितीसाठी सहायक आयुक्त विवेक पवार यांनी प्रशासनाकडे पाठपुरावा केला.
नव्याने निर्माण होणाऱ्या सहा आणि सात परिमंडळांसाठी दोन कोटी ३६ लाख ४८ हजार रुपयांचा निधी मंजूर करण्यात आला आहे. पोलिस आयुक्त अमितेशकुमार, पोलिस सह आयुक्त रंजनकुमार शर्मा यांच्या नेतृत्वाखाली नवीन वर्षांत नवीन पोलिस ठाण्याचे कामकाज सुरू होणार आहे.
परिमंडळ व पोलिस ठाणी
परिमंडळ एक : खडक, फरासखाना, समर्थ, विश्रामबाग, शिवाजीनगर, डेक्कन
परिमंडळ दोन : स्वारगेट, सहकारनगर, पर्वती, बिबवेवाडी, मार्केट यार्ड, भारती विद्यापीठ, आंबेगाव.
परिमंडळ तीन : कोथरूड, वारजे माळवाडी, अलंकार, उत्तमनगर, नांदेड सिटी, सिंहगड रस्ता, नऱ्हे.
परिमंडळ चार : बाणेर, चतु:शृंगी, खडकी, विश्रांतवाडी, येरवडा, लक्ष्मीनगर.
परिमंडळ पाच : येवलेवाडी, कोंढवा, वानवडी, बंडगार्डन, कोरेगाव पार्क, लष्कर.
परिमंडळ सहा : मुंढवा, हडपसर, काळेपडळ, फुरसुंगी, मांजरी, लोणी काळभोर.
परिमंडळ सात : लोणीकंद, वाघोली, लोहगाव, विमानतळ, खराडी, चंदननगर.