दापोली येथील डॉ. बाळासाहेब सावंत कोकण कृषी विद्यापीठात कृषी शिक्षण घेतल्यानंतर नोकरी न करता स्वतःच्या शेतातच काहीतरी नवीन प्रयोग करून आर्थिक उत्पन्न मिळवण्याचा विचार शुभमने केला. सप्टेंबरमध्ये बागेच्या दोन ओळींमध्ये विशेष बेड तयार करून ‘विजय’ वाणाची कलिंगड लागवड केली. साधारणतः जूनपूर्वी संपणाऱ्या कलिंगड हंगामाच्या बाहेर हा प्रयोग करणं तसं मोठं आव्हान होतं. परंतु योग्य नियोजन, सिंचन आणि खत व्यवस्थापनामुळे हा प्रयोग यशस्वी केला आहे.
Akola News : कलिंगड लागवडीचा यशस्वी प्रयोग, महिला शेतकऱ्याने ७५ दिवसांत घेतलं अडीच लाखांचं उत्पन्न
शुभमने अत्याधुनिक तंत्रज्ञान आणि कृषी शिक्षणाच्या ज्ञानाचा उपयोग करून पारंपारिक शेतीपासून एक पाऊल पुढे टाकत बिगर हंगामी कलिंगडाचे आंतरपीक घेऊन लाखोंचा नफा मिळवला आहे. शेतीमध्ये नवनवीन प्रयोग करणाऱ्या तरुणांची संख्या वाढत असताना शुभमची ही यशोगाथा प्रेरणादायी ठरत आहे.

लागवडीवेळी ह्युमिक अॅसिड, 19:19:19, बुरशीनाशक – कीटकनाशकांचा वापर, तसंच बेसल डोसमध्ये स्मार्ट मिलसह सेंद्रिय खत, 10:26:26, सूक्ष्म अन्नद्रव्यं, घरचं गांडूळ खत, पोटॅशियम शोनाइट, कॅल्शियम, मॅग्नेशियम, बोरॉन यांसारखी खतं ठिंबक सिंचनाच्या मदतीने दिल्याने कलिंगडाची वाढ उत्कृष्ट झाली. काळजीपूर्वक चार-पाच दिवसांच्या अंतराने फवारण्या घेऊन पिकावर नियंत्रण ठेवलं.
कमी खर्चात, खडकाळ जमिनीतून वर्षाला १५ लाखांचं उत्पन्न; पारंपरिक शेतीसह फळ लागवडीने शेतकरी मालामाल
या ऑफ-सीजन पिकासाठी पुणे आणि वाशी, नवी मुंबई बाजारपेठांमध्ये भेट देऊन शुभमने मार्केटिंगची पूर्वतयारी केली. कलिंगड व्यापाऱ्यांशी संपर्क साधून दरांचा अभ्यास केला. परिणामी, त्यांच्या शेतातूनच प्रतिकिलो 20 रुपये दराने थेट विक्री सुरू झाली. लागवडीनंतर 52 दिवसांतच तोडणी सुरू झाली असून सुमारे 10 टन कलिंगडाचं उत्पादन मिळणं अपेक्षित आहे.

एकूण दोन लाख रुपयांचं उत्पन्न होणार असून खर्च वजा करता तब्बल 1 लाख 40 हजारांचा निव्वळ नफा शुभम दोरकडेच्या हाती मिळेल असा शुभमचा अंदाज आहे. पहिल्याच प्रयोगात शुभम यशस्वी ठरला आहे. कोकणातील या शेतकरी तरुणाने आपल्या स्वतःच्या जागेत प्रयोगशील कलिंगडाची शेती राबवून, आधुनिक तंत्रज्ञानाचा वापर करत कलिंगडाचा हंगाम नसतानाही कलिंगड पीक घेता येतं आणि त्यातून चांगलं उत्पन्न मिळतं हे सिद्ध केलं आहे. इतकंच नाही तर कोकणातील तरुणांना शेती बागायतीमध्ये नवीन कल्पक शेती व्यवसायिक उपक्रम राबवून त्यातूनच रोजगार मिळवता येईल, याचाही आदर्श शुभमने घालून दिला आहे.