प्रार्थनास्थळांवरील ध्वनिक्षेपकाच्या मुद्द्यावरून झालेल्या वादानंतर ठाण्यात एप्रिल २०२२ मध्ये मनसे अध्यक्ष राज ठाकरे यांची ठाण्यात ‘उत्तर सभा’ झाली होती. या सभेत स्थानिक मनसे पदाधिकारी व कार्यकर्त्यांनी राज ठाकरे यांना सत्कारानंतर तलवार दिली. ही तलवार व्यासपीठावर ठाकरे यांनी म्यानातून बाहेर काढून हवेत उंचावली होती. या प्रकरणी ठाकरे यांच्यासह मनसे ठाणे-पालघर जिल्हाध्यक्ष अविनाश जाधव, ठाणे शहर अध्यक्ष रवींद्र मोरे आणि इतर सात ते आठ जणांविरुद्ध नौपाडा पोलिस ठाण्यात गुन्हा दाखल झाला होता. या प्रकरणाची सुनावणी आज, गुरुवार, ११ डिसेंबर रोजी ठाणे जिल्हा सत्र न्यायालयात झाली. यानिमित्ताने राज ठाकरे यांनी ठाण्यात हजेरी लावली.

राज्यात तत्कालीन महाविकास आघाडी सरकारच्या काळात मनसे अध्यक्ष राज ठाकरे यांनी प्रार्थना स्थळांवरील अनधिकृत ध्वनिक्षेपकांच्या मुद्द्यांवरून सरकारवर टीकेचे बाण सोडले होते. त्यामुळे मनसे आणि सरकारमधील नेत्यांमध्ये आरोप – प्रत्यारोपाच्या फैरी झडत असतानाच ठाकरे यांनी ठाण्यात गडकरी रंगायतन येथील चौकात जाहीर सभा घेतली. त्यांच्या भाषणाआधी मनसेचे ठाणे – पालघर जिल्हाध्यक्ष अविनाश जाधव, ठाणे शहर अध्यक्ष रवींद्र मोरे यांच्यासह कार्यकर्त्यांनी ठाकरे यांना तलवार भेट दिली. ही तलवार राज यांनी म्यानातून बाहेर काढत दाखवली. हीच बाब त्यांना भोवली आहे. आहे.
Manikrao Kokate : विधानसभेला ठाकरेंच्या शिलेदाराची उघड मदत, कोकाटेंकडून परतफेड, भाजपचा फायदा टाळण्यासाठी मोठी ‘चाल’
या प्रकरणी त्यांच्यासह कार्यकर्त्यांवर नौपाडा पोलिस ठाण्यात कलम ३४ सह भारतीय हत्यार कायदा १९५९ चे कलम ४ आणि २५ प्रमाणे गुन्हा दाखल करण्यात आला होता. आता या खटल्याच्या सुनावणीसाठी राज ठाकरे ठाण्यामध्ये आले. यावेळी शहरामधील प्रमुख पदाधिकाऱ्यांशी ठाकरे चर्चा करणार असल्याने मनसैनिकांमध्ये आगामी पालिका निवडणुकीच्या तोंडावर उत्साहाचे वातावरण आहे.
Pune Crime : मुलीच्या फोटोसह स्टेटसला भावनिक मेसेज, पुण्यातून अचानक बेपत्ता; पोलीस निखिल रणदिवे सापडले, पाच दिवस कुठे होते?

‘ठाकरे ब्रँड’ संभाव्य युतीच्या अनुषंगाने महत्व

शिवसेना पक्षप्रमुख (उबाठा) उद्धव ठाकरे आणि मनसे अध्यक्ष राज ठाकरे यांच्या संभाव्य युतीबाबत सध्या जोरदार चर्चा सुरु आहे. या पार्श्वभूमीवर राज ठाकरे यांच्या ठाणे भेटीला आगामी पालिका निवडणुकीच्या तोंडावर विशेष महत्त्व प्राप्त झाले आहे. शिवसेना (उबाठा) नेते व माजी खासदार राजन विचारे यावेळी ठाकरे यांची भेट घेणार आहेत. तसेच ठाकरे या युतीच्या अनुषंगाने येथील पदाधिकारी व कार्यकर्त्यांची नेमकी काय चर्चा करतात, हे पहावे लागणार आहे.