कोल्हापुरातील इचलकरंजी येथील भोनेमाळ परिसरात राहणाऱ्या 19 वर्षीय सुहास सतीश थोरात या तरुणाचे मोटरसायकल दुरुस्तीच्या बहाण्याने अपहरण करून कर्नाटक सीमेवरील देवचंद कॉलेजमागील ओढ्यात कोयत्याने निर्घृण खून करण्यात आला होता. या प्रकरणी शिवाजीनगर पोलिसांनी मुख्य संशयित ओंकार अमर शिंदे (वय 25), ओंकार रमेश कुंभार (वय 23, दोघे रा. लिगाडे मळा) आणि एक अल्पवयीन आरोपीला ताब्यात घेतले आहे. पूर्ववैमनस्याच्या पार्श्वभूमीवर पोलिस तपास सुरू आहे. आता पोलिस तपासात सुहासच्या मेहुणीशी प्रेमसंबंध असल्याचा राग हा खुनामागील मुख्य धागा असल्याचा संशय व्यक्त होत आहे, ज्यामुळे या घटनेला एक नवे वळण मिळाले आहे.

खुनानंतर ओढ्यात फेकला मृतदेह

शुक्रवारी (५ डिसेंबर) दुपारी तीनच्या सुमारास सुहासला संशयित तिघेजण मोटरसायकल दुरुस्तीचे कारण सांगून जबरदस्ती घेऊन गेले. सुहास एका वाहन शोरूममध्ये कामाला असल्याने तो कामावरून घरी जेवायला आला असता संशयितांनी त्याला लिगाडे मळा परिसरातून घेऊन निपाणी जवळील देवचंद कॉलेजकडे नेले. तेथे कोयत्याने डोके, हात, तोंडावर सात-आठ वार करून त्याची निर्घुण हत्या केली आणि मृतदेह जवळच्या ओढ्यात फेकला. इकडे सुहासच्या वडिलांना सतीश थोरात सुहासची काळजी वाटू लागल्याने त्यांनी लगेचच अपहरणाची तक्रार शिवाजीनगर पोलिसांत दाखल केली होती.
पोलिसांचा कॅफेवर छापा, कॉलेज तरुण-तरुणी विचित्र अवस्थेत सापडले; स्पेशल रूम अन् दर तासाला…; शहरात खळबळ
शनिवारी पहाटे मुरगूड पोलिसांना ओढ्यात एक मृतदेह सापडला आणि तो मृतदेह सुहासचा असल्याची ओळख पटल्यानंतर शिवाजीनगर पोलिसांनी तातडीने पथके पाठवली. तर चंदूर रोडवरील शाहूनगरमध्ये पसार होत असताना आरोपींना देखील पोलिसांनी शिताफीने पकडले. यापैकी दोन प्रौढ आरोपींना पाच दिवसांची कोठडी आणि अल्पवयीनला बालसुधारगृहात पाठवण्यात आले आहे.
Kolhapur Accident : लेकाच्या प्रवेशासंदर्भात चौकशीला जाताना काळाची झडप, कार-बाईकची जोरदार धडक; दोघांचा जागीच मृत्यू

पूर्ववैमनस्यामागे प्रेमसंबंधाचा धक्कादायक कोन..

प्राथमिक तपासात वर्षभरापूर्वी सुहास आणि ओंकार शिंदे यांच्यात वाद झाला असल्याचे समोर आले आहे. जेव्हा शिंदेने सुहासला चाकू लावून धमकी दिली होती. मात्र आता तपासात सुहासची मेहुणीशी प्रेमसंबंध असल्याचा राग हा वैमनस्याचा मूळ कारण असल्याचा धागा पोलिसांना मिळाला आहे. या नाजूक प्रकरणाचा तपास वेगाने होत असून आणखी कोणाचा सहभाग आहे का, याचाही शोध घेतला जात आहे, अशी माहिती पोलीस निरीक्षक शिवाजी गायकवाड यांनी दिली आहे.
क्रिकेट खेळताना चेंडू आणायला गेला अन् क्षणात सगळं संपलं; 13 वर्षीय एकुलत्या एक लेकाच्या मृत्यूने कुटुंबाला धक्का

मोबाईलवरचा स्टेटस आणि कारवाई..

ओंकार शिंदे हा रेकॉर्डवरील गुन्हेगार असून त्याने खूनानंतर सोशल मीडियावर “सूरज ढलता है, डुबता नहीं” असा स्टेटस टाकला होता, ज्यामुळे पोलिसांचे लक्ष वेधले गेले. त्यानंतर खुनानंतर शहरात परतलेल्या आरोपींना पकडण्यात पोलिसांना यश मिळाले. पोलिसांनी सीसीटीव्ही, मोबाइल लोकेशन, शस्त्र जप्ती आणि घटनास्थळ पंचनामा केला आहे. अपहरण, खून आणि ॲट्रॉसिटीचे गुन्हे दाखल झाले असून अल्पवयीन आरोपी हा सुहासचा मित्र तसेच दहावीचा विद्यार्थी असल्याचे समोर आले आहे.

दरम्यान, या घटनेने इचलकरंजी शहर हादरले असून शनिवारी पोलिस ठाण्याबाहेर नातेवाईक आणि स्थानिकांनी गर्दी करून न्यायाची मागणी केली. तरुणांच्या सुरक्षेसाठी कडक पावले उचलावीत, अशी मागणी होत आहे. सुहासचे कुटुंब शोकाकूल असून तपासाला वेग देण्याची मागणी करण्यात आली आहे.