आगामी कोल्हापूर महानगरपालिका निवडणुकीच्या पार्श्वभूमीवर शहराच्या राजकारणात मोठी उलथापालथ झाली आहे. काँग्रेसच्या माजी महापौर सई खराडे, त्यांचे चिरंजीव शिवतेज खराडे आणि सामाजिक कार्यकर्ते इंद्रजीत आडगुळे यांचा शिंदेंच्या शिवसेनेत जाहीर पक्षप्रवेश केला. हा सोहळा एकनाथ शिंदे यांच्या उपस्थितीत ठाण्यात पार पडला, जिथे त्यांनी तिघांना भगवा झेंडा देत पक्षात स्वागत केले.

क्षीरसागरांच्या पुढाकाराने झाला पक्षप्रवेश
या पक्षप्रवेशासाठी कोल्हापूर उत्तरचे आमदार आणि राज्य नियोजन मंडळाचे कार्यकारी अध्यक्ष राजेश क्षीरसागर यांनी पुढाकार घेतला. यावेळी माजी आमदार सुजित मिनचेकरही उपस्थित होते. सई खराडे यांनी चंद्रेश्वर प्रभागातून दोन वेळा कोल्हापूर महानगरपालिकेत प्रतिनिधित्व केले असून, 2005 मध्ये त्यांनी महापौरपद भूषविले होते. त्या माजी कृषीमंत्री कै. श्रीपतराव बोंद्रे यांच्या पुतणी, ज्येष्ठ नेते कै. महिपतराव बोंद्रे यांच्या कन्या आणि कॉंग्रेसचे माजी जिल्हाध्यक्ष कै. सखाराम बापू खराडे यांच्या स्नुषा आहेत.

शिवतेज खराडे हे शिवाजी पेठ प्रभागातून महापालिका निवडणुकीसाठी इच्छुक आहेत. तर इंद्रजीत आडगुळे हे माजी नगरसेवक ॲड. महादेवराव आडगुळे यांचे चिरंजीव असून, 1999 च्या विधानसभा निवडणुकीत दुसरा क्रमांकाची मते मिळवित पराभूत झाले होते. 2010 च्या महापालिका निवडणुकीतही ते थोडक्या मतांनी पराभूत झाले होते. या तिघांच्या प्रवेशामुळे शिंदे गटाची कोल्हापूरमधील ताकद वाढेल, असे मत राजकीय विश्लेषकांनी व्यक्त केलं आहे.

दरम्यान, या घटनेने कोल्हापुरात काँग्रेसला पुन्हा एक मोठा धक्का बसला असून, आधीही शारंगधर देशमुख, जयश्री जाधव यांसारख्या नेत्यांनी शिंदे गटाची वाट धरली आहे. महायुती सरकारकडून कोल्हापूरवर विशेष लक्ष केंद्रित असल्याचे पाहायला मिळत आहे. निवडणूक तोंडावर असताना झालेल्या या पक्षप्रवेशामुळे शिवसेनेला स्थानिक पातळीवर बळकटी मिळाली आहे. यामुळे महापालिका निवडणुकीतील रणनीतींमध्ये बदल पाहायला मिळतील, हे मात्र नक्की.