किरकोळ कारणावरून वाद सुरू

मृत महिलेचे नाव ज्योती धाहीजे असे असून, प्राथमिक चौकशीतून समजते की काल रात्री पती-पत्नीमध्ये किरकोळ कारणावरून वाद झाला. वाद तीव्र झाला असता, संतापाच्या भरात पोपट धाहीजे याने पत्नीचा गळा आवळून तिचा जीव घेतल्याची माहिती पोलीस तपासातून पुढे आली आहे. घटना घडताच आरोपीने घरातून पळ काढला आणि अंधारात मिसळून पसार झाला.पुण्यातून मुलीला पळवून नेलं, नंतर पोलिसांना चकवा दिला, पुण्याच्या पोलिसांनी उत्तर प्रदेशात जावून आरोपींच्या नांग्या ठेचल्या

3-4 वर्षांपासून रहिवासी

घटनेची माहिती मिळताच मानपाडा पोलिसांनी तत्काळ घटनास्थळी धाव घेतली. घरात ज्योतीचा मृतदेह आढळल्याने हत्या झाल्याचे स्पष्ट झाले. त्यानंतर मानपाडा पोलीस ठाण्यात या प्रकरणी खुनाचा गुन्हा दाखल करण्यात आला आहे. आरोपी पतीच्या शोधासाठी दोन स्वतंत्र पथके तयार करण्यात आली असून, सीसीटीव्ही फुटेज, परिसरातील हालचाली, संभाव्य ठिकाणे आणि नातेवाईकांकडून माहिती गोळा करण्याचे काम पोलिसांकडून सुरू आहे. मिळालेल्या माहितीनुसार, पती-पत्नी मूळचे जालना जिल्ह्यातील असून, गेल्या तीन–चार वर्षांपासून ते कोळेगावात राहत होते. नेमका वाद कशावरून झाला, त्यामागे अन्य काही कारण होते का, हे सर्व तपासातून स्पष्ट होणार आहे.

आरोपी अद्याप फरार

या प्रकरणाबाबत डीसीपी अतूल झेंडे यांनी महात्त्वाची माहिती दिली आहे, “काल सायंकाळी मानपाडा पोलीस ठाण्याच्या हद्दीत एका महिलेचा मृत्यू झाल्याची माहिती मिळाली. स्थानिक अधिकाऱ्यांनी घटनास्थळी पोहचल्यावर तिची गळा आवळून हत्या झाल्याचे आढळले. प्राथमिक तपासात महिलेच्या पतीवर संशय असून, किरकोळ वादातून ही घटना घडल्याचे दिसून येते. आरोपी पती फरार असून, त्याच्या शोधासाठी दोन पथके रवाना करण्यात आली आहेत. लवकरच आरोपीला अटक करण्यात येईल.”

पोलिस तपास जोरात सुरू असून, या हत्येमुळे कोळेगाव परिसरात खळबळ उडाली आहे. नागरिकांमध्ये भीतीचे वातावरण निर्माण झाले असून, आरोपीला शक्य तितक्या लवकर पकडण्याची मागणी नागरिकांकडून होत आहे.