ठाण्यात महायुतीत श्रेयवादावरुन वादाची ठिणगी पडली आहे. प्रकल्पग्रस्तांच्या एक टक्के मुद्रांक शुल्कात सवलत देण्यावरुन दोन्ही पक्षांच्या पदाधिकाऱ्यांमध्ये श्रेयवाद पेटला आहे. या प्रकरणात भाजपच्या माजी नगरसेवकाने मारहाण केल्याचा आरोप शिवसेनेच्या पदाधिकाऱ्यांनी केला आहे.
बीएसयुपी घरात राहणाऱ्या प्रकल्पग्रस्तांना एक टक्के मुद्रांक शुल्कात सवलत देऊन अवघ्या १०० रुपये मुद्रांक शुल्क आकारण्याचा निर्णय राज्य सरकारने घेतला. या निर्णयामुळे ठाण्यातील रहिवाशांना दिलासा मिळाला. या निर्णयाबद्दल राज्य सरकारचे आभार मानत श्रेय घेण्याची चढाओढ महायुतीतील शिवसेना-भाजपच्या नेते आणि पदाधिकाऱ्यांमध्ये लागली आहे.
या पार्श्वभूमीवर गुरुवारी रात्री पाचपाखाडी येथे टेकडी बंगला परिसरातील रायगड आळी भागात शिवांजली सोसायटीत शिवसेनेचे स्थानिक पदाधिकारी राजेश मोरे यांच्या माध्यमातून जल्लोष केला जाणार होता. याठिकाणी शिवसेनेचे उपविभागप्रमुख महेश लहाने आणि शाखाप्रमुख हरेश महाडिक यांना भाजपचे माजी स्थानिक नगरसेवक नारायण पवार यांनी मारहाण केल्याचा आरोप राजेश मोरे यांनी केला. या घटनेनंतर शिवसेनेच्या पदाधिकाऱ्यांनी नौपाडा पोलीस ठाण्यात धाव घेत पवार यांच्याविरोधात तक्रार दाखल केली.
निवडणुकीच्या तोंडावर शिवसेनेची स्टंटबाजी
“पालिका निवडणुकीच्या तोंडावर शिवसेनेची ही स्टंटबाजी असून अशी कोणतीही मारहाण केली नाही”, असा दावा नारायण पवार यांनी केला. “या घटनेत तथ्य असल्यास विरोधकांनी सीसीटीव्ही फुटेज अथवा चित्रफीत समोर आणावी”, असेही आव्हान पवार यांनी दिले. कोणाचीही दादागिरी खपवून घेतली जाणार नाही. स्थानिक दहशतीला कंटाळले असल्याचे प्रत्त्युत्तर राजेश मोरे यांनी दिले. दरम्यान दोन्ही पक्षाच्या कार्यकर्त्यांनी या निर्णयाच्या पार्श्वभूमीवर नेत्यांना मिठाई भरवत आनंदोत्सव साजरा केला.
दोन्ही पक्षांमध्ये चढाओढ
या निर्णयाच्या श्रेयवादातून दोन्ही पक्षांमध्ये चढाओढ लागली आहे. भाजप आमदार संजय केळकर यांनी या निर्णयानंतर धर्मवीर नगर येथील बीएसयुपी इमारतींमधील रहिवाशांसोबत जल्लोष साजरा केला. तर युवासेना ठाणे लोकसभा अध्यक्ष नितीन लांडगे यांनी या रहिवाशांचा संवाद उपमुख्यमंत्री एकनाथ शिंदे यांच्याशी घडवून दिला. यावेळी रहिवाशांनी या निर्णयाबद्दल शिंदे यांचे आभार मानले. तसेच ब्रह्मांड येथे राहणाऱ्या जोगिला तलाव विस्थापित रहिवाशांसोबत टेंभीनाक्याचे शाखाप्रमुख निखिल बुडजडे यांनी जल्लोष साजरा केला. यावेळी स्थानिकांनी खासदार नरेश म्हस्के यांचे आभार मानले.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा