दिल्लीत जाऊन उपमुख्यमंत्री एकनाथ शिंदे भाजपच्या वरिष्ठ नेत्यांची भेट घेणार आहेत. आज पोलीस विभागाचा एक कार्यक्रम होता. त्याचं निमंत्रण एकनाथ शिंदेंना देण्यात आलं होतं. पण शिंदे या कार्यक्रमाला अनुपस्थित राहतील, अशी माहिती शिंदे यांच्या विभागाकडून देण्यात आली. या कार्यक्रमाला मुख्यमंत्री देवेंद्र फडणवीस आणि उपमुख्यमंत्री अजित पवार हजर राहिले. शिंदे यांच्या अनुपस्थितीची बरीच चर्चा झाली. गेल्या काही दिवसांतील घडामोडी पाहता शिंदे यांची गैरहजेरी चर्चेचा विषय ठरली. दिल्लीला रवाना झालेले शिंदे उद्या बिहारला जाणार आहेत. उद्या पाटण्यात एनडीए सरकारचा शपथविधी सोहळा संपन्न होणार आहे. आपण एनडीएसोबत भक्कमपणे असल्याचा संदेश पाटणा दौऱ्यातून शिंदे देतील.
फिर एक बार नितीश कुमार; ‘शिंदे’ करण्याचा डाव फसला; फडणवीस, अजितदादा नसल्यानं गेम कसा पलटला?
शिंदेसेना आणि भाजप यांच्यातील संघर्षानं टोक गाठलं आहे. कल्याण-डोंबिवलीतील शिवेसेनेच्या माजी नगरसेवकांना भाजपमध्ये प्रवेश झाला. प्रदेशाध्यक्ष रविंद्र चव्हाण यांच्या उपस्थितीत पक्षप्रवेश सोहळा संपन्न झाला. त्यावरुन शिंदेसेनेत मोठी नाराजी पाहायला मिळाली. शिंदेंचा बालेकिल्ला असलेल्या ठाण्यात, श्रीकांत शिंदे यांचा लोकसभा मतदारसंघ असलेल्या कल्याणमध्ये या घडामोडी घडत असल्यानं शिंदेसेनेची अस्वस्थता वाढली. त्यातच भाजपचे प्रदेशाध्यक्ष रविंद्र चव्हाण यांच्या उपस्थितीत पक्षप्रवेश झाल्यानं या सगळ्यामागे भाजपचं राज्यातील नेतृत्व असल्याचा संदेश गेला. त्यामुळे शिंदेसेनेची अस्वस्थता जास्त आहे.

या सगळ्या घडामोडी सुरु असताना शिंदेसेनेच्या मंत्र्यांनी काल कॅबिनेट बैठकीवर बहिष्कार घातला. पक्षाकडून केवळ उपमुख्यमंत्री एकनाथ शिंदे बैठकीला उपस्थित होते. शिंदेसेनेच्या सगळ्या मंत्र्यांनी फडणवीस यांची भेट घेतली. गेल्या काही दिवसांत झालेल्या पक्षप्रवेशांबद्दल नाराजी व्यक्त केली. त्यावर उल्हासनगरातून सुरुवात तुम्हीच केली, अशा शब्दांत फडणवीस यांनी त्यांना सुनावलं. तुम्ही केलं तर चालवून घ्यायचं आणि भाजपनं केलं तर आक्षेप घ्यायचा. असा प्रकार चालणार नाही, अशा शब्दांत फडणवीस यांनी शिंदेसेनेच्या मंत्र्यांना झापलं.