मुंबई क्रिकेट असोसिएशनच्या निवडणुकीत विजयी झाल्यानंतर सर्व विजयी उमेदवारांसोबत आमदार मिलिंद नार्वेकर हे देखील राज ठाकरे यांच्या भेटीसाठी शिवतीर्थ बंगल्यावर पोहोचले होते. विशेष म्हणजे, मनसेच्या स्थापनेपासून पहिल्यांदाच म्हणजे तब्बल 20 वर्षानंतर मिलिंद नार्वेकर हे राज ठाकरेंना प्रत्यक्ष भेटले आहेत. दरम्यान, राज ठाकरेंनी सर्व पदाधिकाऱ्यांचं अभिनंदन करत क्रिकेटच्या मदतीसाठी त्यांना आश्वासनही दिलं. ‘क्रिकेटसाठी शक्य ती मदत करणार’, असं राज ठाकरे यांनी म्हटलं. राजकारण बाजूला ठेवून एमसीए निवडणुकीत उतरलेल्या सर्वच राजकीय पक्षांचे अजिंक्य नाईक यांनी यावेळी आभार मानले. याशिवाय, शिवतीर्थावर अनेक गोष्टींची चर्चा झाली.

Sharad Pawar: बिहारमध्ये सुपडा साफ, काँग्रेसचं भवितव्य काय? शरद पवारांचं मत चर्चेत

मुंबई क्रिकेट असोसिएशनच्या अध्यक्षपदी अजिंक्य नाईक यांची बिनविरोध निवड झाल्यानंतर उपाध्यक्षपदी जितेंद्र आव्हाड यांची निवड करण्यात आली आहे. उपाध्यक्ष पदासाठी झालेल्या निवडणुकीत जिंतेंद्र आव्हाडांनी नवीन शेट्टी यांचा 48 मतांनी पराभव केला. तर, सचिव पदावर उन्मेष खानविलकर यांनी विजय मिळवला असून त्यांनी शाह आलम शेख यांचा पराभव केला. एमसीएच्या अध्यक्षपदी अजिंक्य नाईक यांची या आधीच बिनविरोध निवड करण्यात आली आहे. मुंबई क्रिकेट असोसिएशनच्या निवडणुकीत एकूण 362 जणांनी मतदानाचा हक्क बजावला. दरम्यान, अजिंक्य नाईक यांनी सांगितलं की, राज ठाकरे यांचा क्रिकेटला नेहमीच पाठिंबा असतो. नाईक यांनी असेही नमूद केलं की, त्यांचे सदस्य बिनविरोध निवडून आले असून, क्रिकेट हा एक असा खेळ आहे ज्याला मुख्यमंत्री देवेंद्र फडणवीस, शरद पवार, उद्धव ठाकरे, आशिषजी, अजित पवार, एकनाथ शिंदे यांसारख्या अनेक राजकीय नेत्यांचा पाठिंबा मिळतो.