सोलापूर जिल्ह्यातील करमाळा शहरात आगामी नगरपालिका निवडणुकीच्या पार्श्वभूमीवर शिवसेना (शिंदे गट) मध्ये मोठे राजकीय खिंडार पडले आहे. माजी आमदार जयवंतराव जगताप यांची शिवसेना (शिंदे गट) च्या नगरपालिका निवडणूक प्रभारी पदी नियुक्ती होताच, विद्यमान शिवसेना नेते दिग्विजय बागल यांच्या समर्थकांनी आक्रमक भूमिका घेत सामूहिक राजीनामा दिला आहे. या राजीनाम्यांमुळे शिवसेना शिंदे गटाला आगामी निवडणुकीत मोठा धक्का बसण्याची शक्यता निर्माण झाली आहे.

Nashik News: मुंबईतल्या जागावाटपावरुन महायुतीत मिठाचा खडा, मंत्री संजय शिरसाट भाजप नेत्यांवर भडकले

55 पदाधिकाऱ्यांचा सामूहिक राजीनामा

माजी आमदार जयवंतराव जगताप यांच्या नियुक्तीमुळे नाराज झालेल्या दिग्विजय बागल यांच्या गटातील तब्बल 55 शाखाध्यक्ष आणि पदाधिकारी यांनी आपल्या पदांचा सामूहिक राजीनामा देण्याचा निर्णय घेतला आहे. या पदाधिकाऱ्यांनी नोंदणी केलेले 20 हजार सभासद देखील पक्षातून बाहेर पडणार असल्याची माहिती देण्यात आली आहे.

सर्व राजीनामे पोस्टाने पक्षश्रेष्ठींना पाठवण्यात येणार असल्याचे पदाधिकाऱ्यांनी सांगितले. हा निर्णय शिवसेना शाखाध्यक्ष आणि पदाधिकाऱ्यांच्या झालेल्या बैठकीत घेण्यात आला. या सामूहिक राजीनाम्यामुळे करमाळा शहरातील शिवसेना (शिंदे गट) ची ताकद कमी होण्याची चिन्हे आहेत, विशेषतः नगरपालिका निवडणुकीच्या तोंडावर हा मोठा धक्का मानला जात आहे, एवढचं नाही तर सोलापूरचे पालक मंत्री जयकुमार गोरे यांनी बागल हे भाजपत प्रवेश करतील असे संकेत दिले आहेत.

दिग्विजय बागल यांनी यापूर्वी शिवसेना (शिंदे गटाकडून) करमाळा विधानसभेची निवडणूक लढवली होती. त्यामुळे त्यांचे समर्थक मोठ्या संख्येने पक्षात कार्यरत आहेत. माजी आमदार जयवंतराव जगताप यांच्या नियुक्तीमुळे त्यांच्या समर्थकांमध्ये नाराजी पसरली असून आगामी निवडणुकीत बागल गटाला डावलले जात असल्याची भावना त्यांच्यात निर्माण झाली आहे. या नाराजीतूनच हे सामूहिक राजीनामे देण्यात आले असल्याचे सांगितले जात आहे.