Pune Ring Road: पुण्याच्या रिंग रोडलगतच्या 117 गावांचा सुनियोजित विकास होणार आहे. राज्य सरकार लवकरच या गावांचा विकास आराखडा सादर करणार असून, या गावांमध्ये विविध सुविधांची निर्मिती केली जाणार आहे.
या गावांमध्ये शिक्षणसंस्था, गृहप्रकल्प (टाउनशिप) यांसह ट्रक टर्मिनल, लॉजिस्टिक पार्क, ट्रॉमा केअर यांसारख्या विविध घटकांशी संबंधित सुविधांची निर्मिती केली जाणार आहे. पुण्याच्या रिंग रोडचे काम सुरू झाल्यानंतर ‘पुणे महानगर प्रदेश विकास प्राधिकरणा’च्या हद्दीतील हवेली, मुळशी, भोर, वेल्हे आणि पुरंदर या पाच तालुक्यांतील 117 गावांच्या नियोजनाची जबाबदारी ‘राज्य रस्ते विकास महामंडळा’कडे (एमएसआरडीसी) दिली होती. या सर्व गावांचे क्षेत्र सुमारे 668 चौरस किमी आहे. या सर्व गावांसाठी विकास आराखडा तयार करण्याचा आदेश सरकारने ‘एमएसआरडीसी’ला दिल्यानंतर सर्व गावांतील सर्वेक्षण नुकतेच पूर्ण झाले. या सर्वेक्षणानंतर झालेल्या उच्चपदस्थ अधिकाऱ्यांच्या बैठकीत या गावांच्या विकास आराखड्याबाबत सविस्तर चर्चा करण्यात आली.
मुंबईकरांची वाहतूक कोंडीपासून होणार कायमची सुटका? MMRDA उभारणार 70 किमी लांबीचे भुयारी कॉरिडोर; पाहा कुठून कुठे जोडणार
गावांचा ड्रोन सर्व्हे पूर्ण
या गावांचे सर्वेक्षण करताना सध्या कोणत्या सुविधा उपलब्ध आहेत, कोणत्या प्रकारची बांधकामे झाली आहेत, याचा आढावा घेतानाच, अस्तित्वातील जमीन वापराची (ईएलयू) माहिती संकलित करण्यात आली आहे. खेळाची मैदाने कोठे आरक्षित केली आहेत; शिवाय अन्य खुल्या जागांवर कोणत्या सुविधा करण्याचे नियोजन आहे, याकरिता ड्रोनद्वारे सर्वेक्षण केले गेले. उपलब्ध मोकळ्या जागांचे नियोजन आणि विकास करणे शक्य आहे. त्यानुसार नव्याने नियोजन केले जाणार आहे.
भविष्यात या गावांचा विकास करताना त्या गावातील लोकसंख्याही वाढेल. त्यामुळे त्या गावांसाठीची पाणीपुरवठ्याची सुविधा, पाण्याच्या टाक्या, क्रीडांगणे, स्मशानभूमी, मलनिस्सारण प्रकल्प, पर्यटन, अग्निशामक दलासारख्या सुविधांसाठी जागा आरक्षित करावी लागेल. त्या भागाचा सर्वांगीण विकास झाला पाहिजे. नद्यांचे प्रदूषण होऊ नये, यासाठी नद्यांजवळ सांडपाणी प्रकल्प उभारून अशुद्ध पाण्यावर प्रक्रिया करण्याचे नियोजन आहे. यासाठी दोन ग्रोथ सेंटर विकसित केली जाणार आहेत.
पुणे रिंग रोडच्या कामगारांना दमदाटी, काम ठप्प, व्हिडिओ व्हायरल
एज्युकेशन, इंडस्ट्रियल हब
या गावांत उद्योग कंपन्या असल्यास तेथे ‘इंडस्ट्रियल हब’ विकसित केले जाईल. 117 पैकी बहुतांश गावे ही महामार्गालगत असल्याने त्या ठिकाणी विद्यापीठ, शिक्षण संस्थांना आवश्यक जागा आरक्षित केली जाईल. उद्योगांसाठी ‘लॉजिस्टिक पार्क’ उभारण्यात येणार आहे. वाढती लोकसंख्या आणि वाढत्या वाहनांमुळे आतापासूनच 18, 24 आणि 30 मीटर रुंदीच्या आकारांचे मोठे रस्ते तयार करण्यात येणार आहेत. पुढील 20 वर्षांतील भविष्यातील घडामोडीचा विचार करूनचा डीपी तयार करण्यात येणार आहे, याकडे अधिकाऱ्यांनी लक्ष वेधले आहे.
लेखकाबद्दलसानिया कदमसानिया कदम, मटा ऑनलाईनमध्ये कन्सल्टंट पदावर कार्यरत आहे. प्रामुख्याने क्राइम, सिव्हिक आणि पॉलिटिक्स या बातम्या कव्हर करते. याआधी सहा महिने महाराष्ट्र टाइम्स प्रिंटमध्ये कॉलेज क्लब रिपोर्टर म्हणून काम केले आहे. त्या काळात कॉलेज इव्हेंट्स, शैक्षणिक उपक्रम आणि सोशल मीडियावरील ट्रेंड्सवर बातम्या केल्या. मुलुंड वाणिज्य महाविद्यालयातून BMM मध्ये पदवी घेतल्यानंतर सध्या के.सी. महाविद्यालयात MA in Communication and Journalism करत आहे. इंटरनॅशनल घडामोडी आणि पॉप कल्चर हे विषय विशेष आवडीचे असून इंग्लिश आणि मराठी या दोन्ही भाषेत वाचन व लेखन करण्याची आवड आहे.… आणखी वाचा