पोस्टातून रेल्वेचं तिकिटं काढता येणार

तिकीट काढण्यासाठी रेल्वे स्टेशनवर कायम गर्दी असते. तिकीटासाठी तासन् तास रांगेत थांबावं लागतं. त्यामुळे आता प्रवाशांना तिकीट काढणं सोयीचं व्हावं, यासाठी पोस्ट ऑफिसमध्ये तिकीट काढण्याची सुविधा उपलब्ध करून देण्यात आली आहे. सणासुदीच्या काळात रेल्वे काऊंटरवर अनेकदा ‘आयआरसीटीसी’चं तिकीट मिळवणं अवघडच असतं. संकेतस्थळावर तांत्रिक अडचणींमुळे तिकीट बुक करणं शक्य होत नाही; अशावेळी आता प्रवाशांना पोस्टातून रेल्वेचं तिकिटं बुक करता येईल. पोस्ट ऑफिसच्या सेवाही आता 24 तास उपलब्ध होणार आहेत. त्याचा फायदा प्रवाशांना होणार आहे.

पोस्ट ऑफिसमधून तिकीट बुक करण्याची पद्धत कशी?

पुणे रेल्वे विभागात पहिल्या टप्प्यात इचलकरंजी आणि उरुळी कांचन या टपाल कार्यालयांमधून या सेवेचा प्रारंभ करण्यात आला आहे. प्रवाशांना पोस्ट ऑफिसमधून तिकीट बुक करण्यासाठी प्रत्यक्ष फॉर्म भरावा लागेल. तसंच आधार क्रमांक आणि ओळखपत्र दाखवून तिकीट बुक करता येणार आहे. रेल्वे प्रशासनाकडून अधिकृत केलेल्या निवडक पोस्ट ऑफिसेसमध्ये ही सेवा उपलब्ध आहे. प्रवाशांना रेल्वेच्या पॅसेंजर रिझव्हेंशन सिस्टीमच्या (पीआरएस) माध्यमातूनच तिकीट मिळेल. त्यामुळे स्टेशनवर लांब रांगा टाळता येतील; तसंच ग्रामीण भागातील प्रवाशांनाही मोठा लाभ होणार आहे. या सेवेअंतर्गत प्रवासी रेल्वे तिकीट बुकिंगसाठी आपलं नाव, प्रवासाची तारीख, गाडी क्रमांक आणि इतर तपशील पोस्ट ऑफिसमध्ये देऊ शकतात. ठरावीक वेळेत तिकीट छापून मिळेल. त्यावरून प्रवासी प्रवास करू शकतील.

ग्रामीण भागातील प्रवाशांना दिलासा

पुणे विभागातील इचलकरंजीचा सीपी कोड 825 आहे. एप्रिल ते सप्टेंबर या पाच महिन्यांत पाच हजार प्रवाशांनी तिकिटं काढली आहेत. या ठिकाणी सरासरी दररोज 28 तिकिटं काढली जातात. उरुळी कांचनचा सीपी कोड 877 असून, येथून 1676 प्रवाशांनी तिकिटं काढली आहेत. या उरुळी-कांचनमधून दररोज नऊ तिकिटं काढली जातात. काही वेळा वेबसाइटवर तांत्रिक अडचणींमुळे तिकीट बुक करणं शक्य होत नाही; मात्र आता प्रवाशांना पोस्ट रेल्वे कार्यालयामधून तिकिट बुक करता येत आहेत. त्यामुळे ग्रामीण भागातील प्रवाशांना मोठा दिलासा मिळाला आहे.