काँग्रेस आमदार वडेट्टीवारांनी नुकताच एक व्हिडिओ पोस्ट केला आहे. या व्हिडिओमधून त्यांनी मंत्री प्रताप सरनाईक यांच्यावर जमीन लाटल्याचा आरोप केला आहे. यावेळी ते म्हणाले की, “मंत्री सरनाईकांनी स्वतः च्या शिक्षण संस्थेसाठी मोक्याच्या ठिकाणी ४ एकर जमीन, ज्या जमिनीचे बाजारमूल्य हे ४०० कोटी रुपये आहे, ती जमीन फक्त ३ कोटीत खरेदी केली आहे. मंत्र्यांना स्वतःच्या संस्थेच्या नावाने अशाप्रकारे जमीन घेता येते का? असं जर होऊ शकतं तर मग तुम्ही महाराष्ट्र लुटून खा, आम्ही डोळे बंद करून बसतो. आओ लुटो महाराष्ट्र बेचो,” असे विजय वडेट्टीवार म्हणाले आहेत.

Kolhapur News: ‘सरकार घोटाळेबाजांना अभय देतं…’; कोल्हापुरातून विनायक राऊतांनी महायुती सरकारवर डागली तोफ

याप्रकरणी मी सविस्तर माहिती घेऊन माध्यमांसमोर येणार आहे. मी सर्व्हे नंबरसह माहिती देईल, असेही विजय वडेट्टीवार यावेळी म्हणाले आहेत.

या व्हिडिओत वडेट्टीवारांनी पार्थ पवार यांच्या प्रकरणावरही भाष्य केलं आहे. महाराष्ट्रात घोटाळ्यांची मालिका सुरु आहे. पुण्यामध्ये सर्वात मोठे प्रचंड घोटाळे होत आहेत. एक लाख कोटींपेक्षा जास्त किमतीच्या जमिनी बळकावण्याचा सपाटा सुरु आहे. पार्थ पवारांचा करार रद्द झाला. व्यवहार करणाऱ्यांवर गुन्हे दाखल झाले पण, मूळ प्रश्न उरतो की कंपनीचा मालक जो आहे तो सुद्धा यामध्ये दोषी आहे. पार्थ पवारांवरही कारवाई व्हावी, असं विजय वडेट्टीवार म्हणाले आहेत.

दरम्यान, प्रताप सरनाईक यांच्या प्रकरणावर आता महसूल मंत्री चंद्रशेखर बावनकुळे यांनी प्रतिक्रिया दिली आहे. ते म्हणाले की, “वडेट्टीवार फक्त मीडियामध्ये बोलतात, त्यांनी माझ्याकडे तक्रार द्यावी, कोणते प्रकरण आहे त्याची तक्रार दिली तर चौकशी होईल.”