‘तुमच्याकडून अवैध पार्सल पाठवण्यात आलं आहे, आणि तुमच्यावर मनी लॉंड्रिंगचा गुन्हा दाखल झाला आहे. तुम्हाला डिजिटल अरेस्ट केलं आहे’, असं सांगत एका अभियंत्याला फसवलं याप्रकरणी 51 वर्षीय अभियंत्याने सायबर पोलिस ठाण्यात फिर्याद दाखल केली आहे. मिळालेल्या माहितीनुसार, फिर्यादीला विजय पाल नावाच्या व्यक्तीचा फोन आला. त्याने सांगितलं की, ‘तुमच्याकडून अवैध पार्सल पाठवण्यात आलं आहे आणि तुमच्यावर मनी लॉंड्रिंगचा गुन्हा दाखल झाला आहे. मुंबई सायबर सेलने तुम्हाला डिजिटल अरेस्ट केलं आहे’. यानंतर व्हिडिओ कॉलद्वारे डिजिटल अरेस्ट दाखवून फिर्यादीकडून गुन्हा मिटवण्यासाठी मोठी रक्कम मागवली. भीतीपोटी अभियंत्याने कान्हूर पठार मल्टीस्टेट को-ऑप क्रेडिट सोसायटीच्या खात्यातून 8 लाख 80 हजार रुपये राज आनंद ब्लुडार्ट नावाच्या खात्यावर ऑनलाइन पाठवले. नंतर फसवणूक झाल्याचं लक्षात येताच त्यांनी सायबर पोलिस ठाण्यात धाव घेतली. याप्रकरणी अज्ञात आरोपींविरोधात गुन्हा दाखल करण्यात आला असून, पुढील तपास पोलिस निरीक्षक मोरेश्वर पेंदाम करत आहेत.

गुन्हेगारांचे धाबे दणाणले, भाईगिरी करणाऱ्यांचा करेक्ट कार्यक्रम, कल्याण पोलिसांचं कौतुक

डिजिटल अरेस्टचा दुसरा प्रकार

याआधीच जिल्ह्यात श्रीरामपूर येथील डॉक्टरांची तब्बल 7 कोटी रुपयांची फसवणूक डिजिटल अरेस्टच्या नावाखाली करण्यात आली होती. आता पुन्हा अशा स्वरूपाची घटना घडल्याने नागरिकांमध्ये मोठी धास्ती निर्माण झाली आहे. पोलिसांनी कोणत्याही सरकारी यंत्रणेकडून व्हिडिओ कॉलद्वारे डिजिटल अरेस्ट केली जात नाही, असा इशारा दिला आहे.

सायबर पोलिसांनी इशारा दिला आहे. अनोळखी व्यक्तींकडून येणारे कॉल, मेसेज, ईमेल यावर विश्वास ठेवू नका. मनी लॉंड्रिंग,डिजिटल अरेस्ट, KYC अपडेट अशा नावाखाली पैसे मागणारे हे सर्व प्रकार फसवणुकीचे आहेत नागरिकांनी याची दक्षता घ्यावी, असं पोलिसांनी आवाहन केलं आहे.