Mahad Crime: महाडमध्ये मनसे शहराध्यक्षांवर शिवसेना (शिंदे गट) कार्यकर्त्यांकडून प्राणघातक हल्ला करण्यात आला आहे. या प्रकरणामध्ये शिवसेनेचे मंत्री भरत गोगावलेंच्या सांगण्यावरुन हा प्रकार केल्याचा गंभीर आरोप करण्यात येत आहे.
हल्ल्याच्या काही तासांपूर्वीच पंकज उमासरे यांनी राज्याचे फलोत्पादन मंत्री भरत गोगावले यांच्यावर सोशल मीडियावरून जोरदार टीका केली होती. त्यांच्या व्हिडिओत त्यांनी म्हटले होते की, “भरत गोगावले हे शिवराज्याभिषेक कार्यक्रमाचा मलिदा खाणारे असून महाराष्ट्राच्या राजकारणाला लागलेली कीड आहेत.” तसेच त्यांनी “राज ठाकरे यांच्यावर टीका करणाऱ्यांना जशास तसे उत्तर दिले जाईल”, असा इशाराही दिला होता.
Solapur Crime: एकाने गळ्याला कोयता लावला, दुसऱ्याने…; बंदुकीच्या धाकावर दोघांचा ज्वेलरी शॉपवर दरोडा, पण, पुढे असं काही घडलं की….
याच वक्तव्याच्या काही तासांतच त्यांच्या स्टुडिओवर हल्ला झाला, त्यामुळे हा राजकीय सूडाचा बदला असल्याचा आरोप मनसेने केला आहे. स्थानिकांच्या मते, शनिवारी दुपारी ३.३० च्या सुमारास काही जणांनी “सपना मालुसरे व काही महिला कार्यकर्त्यांच्या इशाऱ्यावरून” उमासरे यांच्या स्टुडिओत घुसून त्यांना अमानुष मारहाण केली. या हल्ल्यात त्यांच्या चेहऱ्यावर आणि शरीरावर गंभीर जखमा झाल्या असून, ते बोलण्याच्या स्थितीत नव्हते.
फर्निचर, फोटोफ्रेम्स, कॅमेरे, संगणकांची तोडफोड
या घटनेनंतर मनसे कार्यकर्त्यांनी संताप व्यक्त करत “हा विचारांवरचा हल्ला आहे” अशी तीव्र प्रतिक्रिया दिली आहे. रुग्णालयात उपचार घेत असताना पंकज उमासरे यांनी म्हटले की, “महाड पंचायत समितीच्या माजी सभापती सपना मालुसरे यांच्या उपस्थितीत ७ ते ८ जण माझ्या स्टुडिओत घुसले आणि मला बेदम मारहाण केली. विचारांची लढाई विचारांनी लढायला हवी होती, पण त्यांनी गुंडगिरीचा मार्ग अवलंबला. हा भ्याड हल्ला आहे.” त्यांनी मंत्री भरत गोगावले आणि विकास गोगावले यांच्यावर या हल्ल्यामागे थेट सहभागाचा आरोप केला आहे.
मनसैनिकांमध्ये संतापाची लाट
मनसे नेत्यांनी पोलिस ठाण्यात धाव घेत आरोपींवर तातडीने गुन्हा नोंदवून अटक करण्याची मागणी केली आहे. दरम्यान, महाड पोलिसांनी घटनास्थळी भेट देऊन सीसीटीव्ही फुटेज तपासण्यास सुरुवात केली आहे. घटनेचा प्राथमिक तपास सुरू असून, पोलिसांनी काही संशयितांची नावे नोंदवली आहेत.
महाड शहरात तणाव
या हल्ल्यामुळे महाड शहरात काही काळ तणाव निर्माण झाला होता. मनसेच्या कार्यकर्त्यांनी निषेध नोंदवत “हा विचारांचा संघर्ष आहे, पण शारीरिक हल्ले सहन केले जाणार नाहीत,” असे वक्तव्य केले आहे. दुसरीकडे, शिवसेना (शिंदे गट) कार्यकर्त्यांनी मात्र “हा वाद वैयक्तिक होता” असा दावा केला आहे. या घटनेने रायगड जिल्ह्यातील राजकीय वातावरण पुन्हा पेटले असून, महाडसारख्या शांत शहरात घडलेली ही घटना राजकीय सूड आणि अभिव्यक्ती स्वातंत्र्याच्या मर्यादांवर प्रश्नचिन्ह उपस्थित करते आहे. सध्या महाड पोलीस सदर प्रकरणाचा तपास करत असून, आरोपींविरुद्ध कठोर कारवाईची मागणी होत आहे.
लेखकाबद्दलसुनिल लाटेसुनिल प्रभाकर लाटे, हे एक पत्रकार आहेत. त्यांनी डॉ. बाबासाहेब आंबेडकर मराठवाडा विद्यापीठ येथून बी.ए व एम.ए. पत्रकारितेचं पदव्यूत्तर शिक्षण पूर्ण केलं आहे. कॉलेज जीवनातच ‘दैनिक दिव्य मराठी’मध्ये पत्रकारितेचं प्रत्यक्ष प्रशिक्षण घेतलं आहे. दोन वर्षे ‘लोकसत्ता डॉट कॉम’साठी ‘फोटोगॅलरी व वेबस्टोरी’ या विभागात काम केलं आहे. ते ६ ऑक्टोबर २०२५ पासून ‘महाराष्ट्र टाईम्स’ ऑनलाईनमध्ये कार्यरत आहेत. राजकारण, मनोरंजन, क्रीडा या विषयांच्या लिखाणात आवड आहे. याशिवाय काव्य लेखन, गीत लेखन आणि सादरीकरणातही स्वारस्य आहे. फोटोग्राफी, फोटो, व्हिडिओ संपादनातही खास रस आहे… आणखी वाचा