काँग्रेस कार्यकर्त्यांवर हल्ला करणारे रायगड जिल्हा परिषदेचे समाज कल्याण सभापती दिलीप भोईर उर्फ छोटम आणि त्यांच्या साथीदारांना नोव्हेंबर २०१२ मध्ये अटक करण्यात आली होती. जिल्हा परिषदेचा सभापती असताना पोलीस कोठडीत जाणारे भोईर हे रायगड जिल्हा परिषदेचे पहिले सभापती ठरले होते.
Raj Thackeray: मतचोरी नेमकी कशी होते? राज ठाकरेंनी दाखवलं प्रात्यक्षिक, EVM आणि VVPAT द्वारे घोळ होत असल्याचा दावा
११ सप्टेंबर २०१२ रोजी चोंढी येथे किरकोळ वादातून काँग्रेसचे विजय थळे, त्यांच्या पत्नी रूपाली थळे आणि इतर काँग्रेस कार्यकर्त्यांना शेकापचे दिलीप भोईर आणि त्यांच्या साथीदारांनी मारहाण केली. याप्रकरणी मांडवा सागरी पोलीस ठाण्यात गुन्हा दाखल करण्यात आला होता. त्यानंतर तब्बल पावणेदोन महिने दिलीप भोईर उर्फ छोटम हे पोलिसांना गुंगारा देऊन बाहेर होते. उच्च न्यायालयानेही त्यांचा अटकपूर्व जामीन अर्ज फेटाळला होता. त्यानंतर न्यायालयात हजर राहण्याचे आदेश दिल्यानंतर छोटम जिल्हा न्यायालयाला शरण आले होते. जिल्हा न्यायालयाचे तत्कालीन सत्र न्यायाधीश डॉ. यशवंत चावरे यांच्यासमोर सभापती छोटम आणि त्यांचे सहकारी मकरंद भोईर, विक्रांत कुडतरकर, विवेक कुडतरकर, शिशिर म्हात्रे, संतोष साळुंखे, जयवंत साळुंखे हजर झाले. या सातही जणांचा अटकपूर्व अंतिम जामीन न्यायालयाने फेटाळला होता.

सेशन केस क्र. ७८/२०१३ मध्ये प्रमुख जिल्हा व सत्र न्यायाधीशांनी दिलेल्या निकालानुसार दोषी ठरलेले रायगड जिल्हा परिषदेचे माजी समाज कल्याण सभापती दिलीप उर्फ छोटम विठ्ठल भोईर, विक्रम वामन साळुंखे, विक्रांत विश्वनाथ कूडतरकर, मकरंद रविंद्र भोईर, विकेश वसंत ठक्कर, भरत अभिमान्य खळगे, गणेश रमेश म्हात्रे, संतोष वामन साळुंखे, सज्जाद शगीर मूल्ला, गणेश बळीराम भोईर, विवेक विश्वनाथ कूडतरकर, शिशिर शंकर म्हात्रे, हेमंत अनंत केळकर, जयवंत शामराव साळुंखे, विरेश रमेश खेडेकर, प्रभाकर रामचंद्र गवाणकर, प्रसाद दत्ता शिवदे, अशोक शांताराम थळे, मनोज जगन्नाथ थळे, राजेंद्र काशिनाथ ठाकूर व विजय राजाराम ठाकूर या २१ जणांना शिक्षा करण्यात आली आहे.

दरम्यान, या प्रकरणातील चार आरोपी नितेश सुनिल गुरव, सूजित सदानंद माने, गणेश सोपान साळुंखे व उमेश शांताराम खेडेकर यांना पुराव्याअभावी निर्दोष मुक्त करण्यात आले आहे. या प्रकरणातील मुख्य आरोपी दिलीप भोईर यांच्यावर हाफ मर्डर, मारहाण व गुन्हेगारी कृत्याचे कलमांखाली गुन्हे दाखल होते. न्यायालयाने दिलेल्या शिक्षेमुळे भोईर यांचे आगामी निवडणुकांमधील उमेदवारीचे मनसुबे धुळीस मिळाले आहेत. शिंदे गटात प्रवेश घेतल्यानंतर भोईर हे स्थानिक राजकारणात प्रभावशाली मानले जात होते. मात्र, या निकालानंतर त्यांचा राजकीय प्रवास अडचणीत आला आहे.

या निकालामुळे चोंढी परिसरात चर्चेला उधाण आले असून, शिंदे गटासाठी हा मोठा धक्का असल्याचे राजकीय वर्तुळात म्हटले जात आहे. या शिक्षेच्या पार्श्वभूमीवर भोईर समर्थक आता पुढील कायदेशीर पर्यायांचा विचार करीत आहेत, अशी माहिती मिळाली आहे.

एकंदरीत, चोंढीतील १२ वर्षांपूर्वीचा वाद अखेर न्यायालयीन टप्प्यात निर्णायक ठरला असून, या निर्णयाने स्थानिक राजकीय समीकरणांवर दूरगामी परिणाम होण्याची शक्यता व्यक्त केली जात आहे.