2019 च्या विधानसभा निवडणुकीच्या वेळी भाजपमध्ये असलेल्या सुनील शेळके यांना पक्षाने मावळ मतदारसंघातून उमेदवारी नाकारली होती. त्यानंतर शेळके यांनी राष्ट्रवादी काँग्रेसमध्ये प्रवेश केला होता. त्यावेळी राष्ट्रवादीचे घड्याळ हाती बांधताच सुनील शेळके यांची उमेदवारी जाहीर झाली होती, असं मुरलीधर मोहोळ यांनी सांगितलं.

सुनील शेळके यांनी उमेदवारी जाहीर झाल्यानंतर पहिला फोन मला केला. माझं भाजपमधून तिकीट कट झालं आहे, मला राष्ट्रवादीतून तिकीट मिळालं आहे, तुझं पण तिकीट कट झालं आहे. तिथे चंद्रकांत दादा आलेत, तू माझ्याबरोबर चल, अशी ऑफर सुनील शेळके यांनी त्यावेळी दिल्याचं गुपित मोहोळ यांनी फोडलं.
Rupesh More : वसंत मोरेंचा लेक पुणे महापालिकेच्या आखाड्यात? डबल मुहूर्त साधत तात्यांचे संकेत, मुलाचा पहिलीतला फोटो शेअर करत म्हणाले…
“त्यावेळी मी सुनील शेळकेंना बोललो, मी दिल्या घरी सुखी आहे. तू पण राष्ट्रवादी काँग्रेसमध्ये जाऊ नकोस, तर शेळके बोलले नाही, आता मी परतीचे दोर कापले आहेत. तो त्या पक्षात गेला त्याचं भलं झालं, मी माझ्या पक्षात राहिलो, माझंही भलं झालं, कारण आमची मैत्री अशी आहे.” असा किस्सा मुरलीधर मोहोळ यांनी सांगितला. तळेगाव दाभाडे नगरपरिषदेच्या डॉ. केशव बळीराम हेडगेवार या इमारतीचे उद्घाटनावेळी मुरलीधर मोहोळ यांनी हा किस्सा सांगितला.

कोण आहेत मुरलीधर मोहोळ?

2024 च्या लोकसभा निवडणुकीत पुणे लोकसभा मतदारसंघातून भारतीय जनता पक्षाच्या तिकिटावर विजयी होत मुरलीधर मोहोळ पहिल्यांदा खासदार म्हणून निवडून आले आहेत. पहिल्या टर्मचे खासदार असूनही त्यांना मोदी सरकारच्या तिसऱ्या टर्ममध्ये सहकार आणि नागरी विमान वाहतूक मंत्रालयात राज्यमंत्री म्हणून नियुक्त करण्यात आले आहे. यापूर्वी मुरलीधर मोहोळ यांनी नोव्हेंबर 2019 ते मार्च 2022 पर्यंत पुण्याचे महापौर म्हणून काम पाहिले आहे.