वानवडी पोलिसांना शनिवारी (19 ऑक्टोबर) रात्री गुप्त माहिती मिळाली की ‘इम्प्रेस गार्डन’च्या मागच्या मोकळ्या जागेत काही जण पैशावर कोंबड्यांचा खेळ चालवतात. ही माहिती लगेच तपास पथकाला देण्यात आली. दोन वेगवेगळे ग़ट तयार करून पोलिसांनी जागेवर जाऊन खात्री केली, तर खरोखरच तिथे पाच-सहा इसम कोंबड्यांना भिडवत होते आणि बाजूला उभे राहून हार-जीत ठरवत पैसे टाकत होते.

Pune Crime: पुणे हादरले! हिंजवडीत अजित पवारांच्या निकटवर्तीयाच्या मुलावर तडीपार गुंडांचा हल्ला, कारण…
क्षणाचाही विलंब न करता पोलिसांनी सापळा रचला आणि त्या ठिकाणी तातडीने छापा टाकला. सर्व सहा आरोपी जागेवरच पोलिसांच्या हाती लागले. अमोल सदाशिव खुर्द (रा. रविवार पेठ), मंगेश आप्पा चव्हाण (रा. भवानी पेठ), निखिल मनिष त्रिभुवन (रा. घोरपडी), अमिर आयुब खान (रा. घोरपडीगाव), सचिन सदाशिव कांबळे (रा. भवानी पेठ) आणि प्रणेश गणेश पॅरम (रा. कॅम्प). या आरोपींना पोलिसांनी बेड्या ठोकल्या आहेत.

या सर्वांकडून पोलिसांनी सहा रंगीत फायटर कोंबडे, त्यांना घेऊन जाण्यासाठी वापरलेल्या सहा पिशव्या, तीन मोटारसायकली, पाच मोबाईल फोन आणि 2,570 रुपयांची रोकड असा एकूण 5 लाख 11 हजार 880 रुपयांचा मुद्देमाल जप्त केला आहे. कोंबड्यांना झुंजीसाठी वापरताना त्यांना क्रूरपणे वागवलं जात असल्याचंही पोलिसांच्या लक्षात आले आहे.

या घटनेनंतर वानवडी पोलीस ठाण्यात महाराष्ट्र जुगार प्रतिबंधक कायदा कलम 12(ब) आणि प्राण्यांवरील क्रूरतेस प्रतिबंध करणारा कायदा अंतर्गत गुन्हा दाखल करण्यात आला आहे. सर्व आरोपींना ताब्यात घेऊन पुढील तपास सुरू आहे. सदर कारवाई ही अपर पोलीस आयुक्त (पूर्व विभाग). मनोज पाटील, पोलीस उपायुक्त परिमंडळ 5 डॉ. राजकुमार शिंदे, आणि सहाय्यक पोलीस आयुक्त वानवडी विभाग धन्यकुमार गोडसे यांच्या मार्गदर्शनाखाली पार पडली.