पोलिसांनी दिलेल्या माहितीनुसार, फिर्याद वडगाव शेरी भागातील एका उच्चभ्रू सोसायटीत राहणाऱ्या तरुणीने दिली आहे. फिर्यादी तरुणीला प्राण्यांवर विशेष प्रेम असून, तिच्याकडे ‘डॅश’ नावाचा लॅब्रेडोर जातीचा पाळीव कुत्रा होता. डॅशच्या नियमित देखभालीसाठी ती वेळोवेळी त्याला कल्याणीनगरमधील प्रसिद्ध ‘वेटीक पेटशॉप’ येथे पाठवत असे. या पेटशॉपमध्ये प्राण्यांना आंघोळ घालणे, ट्रिमिंग, आरोग्य तपासणी आणि देखभाल अशा सेवा दिल्या जातात.
Pune News : गुगल पेवरून नाव शोधलं, इंस्टग्रामवरून नंबर घेतला अन् लॅपटॉप परत केला, पुण्यातील प्रामाणिक रिक्षा चालकाची चर्चा
28 सप्टेंबर रोजी दुपारीही तिने आपला कुत्रा नेहमीप्रमाणे आंघोळीकरिता त्या पेटशॉपमध्ये पाठविला होता. मात्र, काही वेळानंतर तिला कर्मचाऱ्यांकडून धक्कादायक फोन आला की, आंघोळ झाल्यानंतर डॅशला उलट्या होत आहेत. तरुणीने तातडीने तेथे धाव घेतली, परंतु तोपर्यंत डॅशचा मृत्यू झाला होता.

फिर्यादी तरुणीने पोलिसांना दिलेल्या निवेदनात नमूद केले आहे की, पेटशॉपमधील कर्मचाऱ्यांनी आंघोळ घालताना आवश्यक ती काळजी घेतली नाही. गरम पाणी वापरणे, चुकीचे शॅम्पू लावणे किंवा दीर्घकाळ सुकविण्यासाठी ड्रायरचा वापर केल्याने कुत्र्याला त्रास झाला असावा. कर्मचाऱ्यांचा निष्काळजीपणा आणि गैरव्यवहारच या दुर्घटनेला कारणीभूत ठरला, असा आरोप तिने केला आहे.

या घटनेनंतर परिसरातील नागरिक आणि प्राणीप्रेमी संघटनांनीही या प्रकरणात पेटशॉपवर कठोर कारवाईची मागणी केली आहे. प्राणीसंवर्धन कार्यकर्त्यांनी अशा प्रकारच्या निष्काळजीपणामुळे पाळीव प्राण्यांचे जीव धोक्यात जात असल्याचा निषेध नोंदविला आहे.
Buldhana News: घरातून निघाले ते परतलेच नाही, दोन दिवसांनी दिव्यांग शिक्षकाची बॉडी सापडली; पत्नीचा आक्रोश, लेकरांचं पितृछत्र हरपलं
या प्रकरणात वेटीक पेटशॉपचे मालक तसेच कर्मचारी इस्माईल शेख आणि राज ऊर्फ प्रदीप दास यांच्यासह तिघांविरुद्ध प्राणी क्रूरता प्रतिबंधक अधिनियमाच्या कलम 11, तसेच भारतीय दंड विधानातील अन्य संबंधित कलमान्वये गुन्हा दाखल करण्यात आला आहे.

या प्रकरणाचा तपास सहायक पोलिस निरीक्षक पाटील यांच्या मार्गदर्शनाखाली सुरू असून, मृत कुत्र्याचे शवविच्छेदन अहवाल मिळाल्यानंतरच मृत्यूचे नेमके कारण स्पष्ट होईल, असे पोलिसांनी सांगितले आहे. दरम्यान, पाळीव प्राण्यांच्या देखभालीसाठी असलेल्या पेटशॉप्समध्ये सुरक्षा मानकांचे पालन केले जाते का, याबाबतही आता चौकशी सुरू करण्यात आली आहे.

या घटनेमुळे कल्याणीनगर परिसरात मोठी खळबळ उडाली असून, ‘डॅश’च्या मृत्यूने अनेक प्राणीप्रेमी भावनिक झाले आहेत. प्राण्यांच्या हक्कांबाबत आणि त्यांच्या सुरक्षिततेसाठी ठोस उपाययोजना करण्याची मागणी पुन्हा एकदा जोर धरत आहे.