मिळालेल्या माहितीनुसार, फिर्यादी कडकर (नाव बदलेले) यांची मुलगी मुरुड येथील स्थानिक महाविद्यालयात शिक्षण घेत होती. त्याच गावातील संतोष सांबळे (नाव बदलेले) हा विवाहित असून सुद्धा कडकर यांची मयत मुलगी हिच्याशी सतत फोन आणि चॅटद्वारे संपर्क साधत होता. अल्पवयीन असल्याचे माहित असतानाही, त्याने तिच्याशी अनुचित संबंध प्रस्थापित करण्याचा प्रयत्न केला. मयत मुलीने संवाद टाळल्यानंतर आरोपीने तिला सतत फोन करून “माझ्याशी बोलली नाहीस तर तुझी बदनामी करेन, कॉलेजमध्ये सांगीन, तुला जगू देणार नाही”, अशा शब्दांत धमक्या दिल्या.

या सततच्या मानसिक छळाला कंटाळून पीडित मुलीने राहत्या घरी गळफास घेऊन आपले जीवन संपवले. घटनेची माहिती मिळताच मुरुड पोलिस ठाण्याचे सहाय्यक पोलिस निरीक्षक आणि फॉरेन्सिक पथक घटनास्थळी दाखल झाले. सखोल तपासानंतर आरोपी सांबळे याच्याविरुद्ध भादंवि कलम 306 नुसार जीव देण्यास प्रवृत्त केल्याचा गुन्हा दाखल करण्यात आला आहे.

या घटनेने फिर्यादी यांच्या गावासहीत परिसरात शोककळा पसरली असून, “मोबाइलच्या मागे लपलेला सायबर छळ आता थेट जीव घेतोय” अशा प्रतिक्रिया समाजमाध्यमांतून उमटत आहेत. स्थानिकांनी अशा प्रकरणांवर कठोर कायदेशीर कारवाई करण्याची मागणी केली आहे.

“मोबाइलच्या माध्यमातून सुरू होणारा छळ, धमक्या आणि दबाव – हे फक्त सायबर अपराध नाहीत, तर निष्पाप जीव घेणारे विष बनत चालले आहे,” असे वक्तव्य सामाजिक कार्यकर्त्या रुपाली भाटे यांनी मत व्यक्त केले आहे. या घटनेने परिसरात संतापाची लाट उसळली आहे.