मुंबई, नवी मुंबई आणि ठाणे महानगरपालिकेतील कर्मचाऱ्यांची दिवाळी गोड करणारा निर्णय जाहीर करीत उपमुख्यमंत्री एकनाथ शिंदे यांनी ही रक्कम कर्मचाऱ्यांना अदा करण्याचे निर्देश संबंधित महापालिका आयुक्तांना गुरुवारी दिले. यंदा मुंबई महापालिकेतील कर्मचाऱ्यांना ३१ हजार रुपये बोनस मिळणार आहे. त्यांना २०२३ मध्ये २६ हजार रुपये तर, २०२४ मध्ये २९ हजार बोनस जाहीर झाला होता. या बोनसमुळे मुंबई महापालिकेवर २८५ कोटी रुपयांचा आर्थिक भार पडणार आहे.
ढगांचा गडगडाट, विजांचा कडकडाट, मुंबई-ठाण्यात अचानक कोसळधार, दिवाळीच्या उत्साहावर विरजण
मुंबई महापालिका अधिकारी, कर्मचारी, अनुदानप्राप्त खासगी प्राथमिक शाळा शिक्षक आणि शिक्षकेतर कर्मचारी, महापालिका प्राथमिक शाळेतील तसेच अनुदानप्राप्त खासगी प्राथमिक शाळेतील शिक्षण सेवक, माध्यमिक शाळेतील शिक्षक, शिक्षकेतर कर्मचारी (अनुदानित आणि विनाअनुदानित), माध्यमिक शाळेतील शिक्षण सेवक, अध्यापक विद्यालय अधिव्याख्याते आणि शिक्षकेतर कर्मचारी, अध्यापक विद्यालय शिक्षण सेवकांना याचा लाभ मिळणार आहे. सामाजिक आरोग्य स्वयंसेविकांना १४,००० रुपये आणि बालवाडी शिक्षिका,मदतनीस यांना ५,००० रुपये भाऊबीज भेट मिळेल.

ठाणे महानगरपालिका कर्मचाऱ्यांना २४ हजार ५०० रुपये सानुग्रह अनुदान देण्याचा निर्णय घेण्यात आला आहे. या निर्णयाचा लाभ ठाणे महापालिकेच्या ९ हजार २२१ कर्मचाऱ्यांना होणार आहे. गेल्या वर्षी ठाणे महापालिकेच्या कर्मचाऱ्यांना २४ हजार रुपयांचे सानुग्रह अनुदान देण्यात आले होते. यंदा त्यात ५०० रुपयांची वाढ करण्यात आली आहे. ठाणे महापालिकेचे ६०५९ कर्मचारी, शिक्षण विभागाचे ७७४ कर्मचारी, परिवहन विभागाचे १४०० कायम कर्मचारी, महापालिकेचे थेट कंत्राटी कर्मचारी आणि इतर ९८८ कर्मचारी यांना याचा लाभ मिळेल.

नवी मुंबई महानगरपालिका कर्मचाऱ्यांना ३४ हजार ५०० रुपये सानुग्रह अनुदान देण्यात येणार आहे. यात नवी मुंबई महानगरपालिका आस्थापनेवरील अधिकारी, कर्मचारी, प्राथमिक व माध्यमिक शिक्षक यांना ३४ हजार ५०० रुपये मिळतील. ठोक मानधनावर, किमान वेतनावरील तात्पुरत्या स्वरूपात करार पध्दतीवरील वेतनश्रेणीमध्ये कार्यरत असणारे अधिकारी-कर्मचारी, रोजंदारीवरील आरोग्य सेवक, मानधनावरील बालवाडी शिक्षक व मदतनीस यांना २८,५०० रुपये सानुग्रह अनुदान मिळेल.

सर्व शिक्षा अभियान व राष्ट्रीय आरोग्य अभियानांतर्गत शासनाने कंत्राटी तत्त्वावर नेमलेले व शासनाकडून मानधन प्राप्त होणाऱ्या कंत्राटी कर्मचाऱ्यांनाही २८,५०० रुपये सानुग्रह अनुदान मिळणार आहे. तसेच आरोग्य विभागातील आशा सेविकांना १८,५०० रुपये मिळतील.

कोकण रेल्वे कर्मचाऱ्यांना १७,९०० रुपयांचा बोनस
मुंबई : कोकण रेल्वे कॉर्पोरेशनने कर्मचारी-अधिकाऱ्यांना १७,९०० रुपयांचा दिवाळी बोनस जाहीर केला आहे. कोकण रेल्वेमधील ४,९९० कर्मचारी-अधिकाऱ्यांना याचा लाभ मिळेल. त्यामुळे त्यांची दिवाळी गोड होणार आहे. करोनानंतर कोकण रेल्वेने सलग तिसऱ्या वर्षी नफा मिळवला असून, आणखी महसूलवाढीवर कोकण रेल्वेने लक्ष केंद्रित केले आहे