एसटी बँकेच्या संचालक मंडळाच्या बैठकीत मोठा राडा झाल्याची माहिती मिळत आहे. गुणरत्न सदावर्ते आणि शिवसेनेच्या आनंदराव अडसूळ यांच्या पॅनलच्या संचालकांमध्ये प्रचंड हाणामारी झाली आहे. या घटनेमुळे एकच खळबळ उडाली आहे. दोन्ही गट आता पोलीस ठाण्यात पोहोचले आहेत.
संचालक मंडळाच्या बैठकीतील एक व्हिडीओ समोर आला आहे. या बैठकीत एक व्यक्ती संचालक मंडळाच्या बैठकीचा व्हिडीओ काढण्यास विरोध करत आहे. बैठकीतील माहिती बाहेर जाता कामा नये, असं ती व्यक्ती म्हणते. त्याला समोरची व्यक्ती विरोध करते तेव्हा बोलणाऱ्या व्यक्तीच्या बाजूची व्यक्ती अत्यंत तावातावात उठते आणि तेट बाटली फेकून मारतो. यानंतर संबंधित व्यक्ती समोरच्या बाजूला बसलेल्या लोकांच्या दिशेला जाते. यावेळी दोन्ही गटांमध्ये हाणामारी सुरु होते. यावेळी प्रचंड शिवीगाळ देखील करण्यात आली. व्हायरल व्हिडीओमध्ये हा गदारोळ बघायला मिळत आहे.
नेमकं काय घडलं?
मिळालेल्या माहितीनुसार, मुंबई एसटी बँकेच्या संचालक मंडळाची बैठक आयोजित करण्यात आली होती. या बैठकीला गुणरत्न सदावर्ते यांच्या पॅनलचे सर्व संचालक आणि शिवसेनेचे नेते आनंदराव अडसूळ यांच्या पॅनलचे सर्व संचालक उपस्थित होते. या बैठकीत एकमेकांवर आरोप करण्यात आले. यावेळी सदावर्ते यांच्या पॅनलच्या व्यक्तीने आमच्या महिला कर्मचाऱ्याशी अश्लील वर्तन केल्याचा आरोप करत अडसूळ यांच्या संचालकांच्या दिशेला बॉटल फेकून मारली. यानंतर या बैठकीत मोठा राडा झाला. या घटनेनंतर आता दोन्ही गट पोलीस ठाण्यात पोहोचले आहेत. या घटनेत पाच ते सहा जण जखमी झाल्याची माहिती मिळत आहे.
प्रसिद्धी पत्रकात सदावर्ते गटावर गंभीर आरोप
या घटनेनंतर एक पत्रक प्रसिद्ध करण्यात आलं आहे. त्यामध्ये नेमकं काय घडलं? या घटनेबाबत थोडक्यात माहिती देण्यात आली आहे. “एसटी को-ऑपरेटिव बँक ही एसटी कर्मचाऱ्यांच्या घामाच्या पैशावर चालणारी आशिया खंडातील सगळ्यात मोठी को-ऑपरेटिव्ह बँक म्हणून ओळखली जात होती. परंतु सध्या ह्या बँकेबाबत नेहमीच काही ना काही विचित्र ऐकायला येते. भ्रष्टाचाराच्या विळख्यात अडकलेले संचालक मंडळ कामगारांच्या मेहनतीच्या पैशांवर मौज करत आहे. याचे अनेक उदाहरणे आजवर आपण बघितलेत”, असं पत्रकात म्हटलं आहे.
“आज एसटी को-ऑपरेटिव्ह बँकेच्या संचालक मंडळाची मीटिंग घेण्यात आली. त्यात अडसूळ गटातील संचालकांनी सदावर्ते गटातील संचालकांनी बँकेत चालवलेला भ्रष्टाचार बाहेर काढल्याने या मीटिंगमध्ये अक्षरश: फ्रीस्टाइल मारामारी बघायला मिळाली. संचालक मंडळाच्या सदावर्ते गटाने अक्षरशः बाहेरून बाया बोलवून त्यांच्या हातून संचालक मंडळाच्या अडसूळ गटाला तुफान मारहाण केली, शिव्यांचा अक्षरशः पाऊसच पडला, कपडे फाडले, लाथा बुक्क्यांनी तुडवले. संचालकांचा हा राडा आता पोलीस स्टेशनपर्यंत गेला असून पुढील कारवाई चालू आहे. अशा संचालकांच्या हाती एसटी बँक देऊन एसटीचे सभासद आता पश्चाताप करत आहेत”, असंदेखील या प्रसिद्धी पत्रकात म्हटलं आहे.
लेखकाबद्दलचेतन पाटील“चेतन पाटील हे पत्रकार आहेत. त्यांना राजकीय, सामाजिक, शैक्षणिक, मनोरंजन आणि क्रीडा अशा विविध बीटच्या बातम्या केल्याचा अनुभव आहे. चेतन पाटील यांनी दैनिक लोकमत, न्यूज 24, जय महाराष्ट्र, आपलं महानगर, न्यूज 18 लोकमत, टीव्ही 9 मराठी अशा विविध वृत्त संस्थांमध्ये काम केल्याचा अनुभव आहे. चेतन हे जवळपास 8 वर्षांपेक्षा अधिकचा काळ माध्यम क्षेत्रात कार्यरत आहेत. त्यांनी कल्याणच्या नामांकित बिर्ला महाविद्यालयातून पत्रकारितेतील पदवी शिक्षण घेतलं आहे. त्यांना पदवीचं शिक्षण घेत असताना एका पॉलिटीकल पीआर कंपनीसोबत काम करण्याचा अनुभव आहे. सध्या ते महाराष्ट्र टाइम्स ऑनलाईन येथे कार्यरत आहेत.
चेतन पाटील यांनी केलेल्या बातमीमुळे एका निराधार वृद्ध महिलेला खूप मोठी मदत झाली. याशिवाय चेतन पाटील यांनी लिहिलेल्या अनेक बातम्यांचा पॉझिटिव्ह इम्पॅक्ट पडलेला बघायला मिळाला आहे.
चेतन पाटील महाविद्यालयात शिक्षण घेत असताना त्यांच्या ‘भगतसिंग’ कवितेची निवड अखिल भारतीय मराठी साहित्य संमेलनाच्या कवीकट्टा सदरात वाचनासाठी झाली होती. चेतन पाटील यांनी नाटकातही काम केलं आहे. त्यांनी राज्य नाट्य हौशी स्पर्धेत भाग घेतलाय. त्यांनी ‘जलरंग तापी’ नाट्य संस्थेसोबत काम करत असताना ‘नटसम्राट’ नाटकात बूटपॉलिश करणाऱ्या राजाची भूमिका साकारली होती. त्यांची ही भूमिका प्रचंड भाव खाऊन गेली होती. त्यांच्या अभिनयाने प्रभावित होऊन एका प्रेक्षकाने त्यांना खांद्यावर उचलून घेत नृत्य केलं होतं.
खूप छोट्या गोष्टींमधून आनंद शोधावा, असं त्यांचं मत आहे. त्यांना पत्रकारितेसह वाचन, लेखनाची आवड आहे. चेतन पाटील यांचं आतापर्यंतचं वैयक्तिक आयुष्य खूप संघर्षमय आणि खडतर असल्यामुळे ते फार संवेदनशील आहेत. त्यामुळे संवेदनशील बातम्या हाताळताना ते अशा बातम्यांना न्याय देण्याचा पूरेपूर प्रयत्न करतात.”… आणखी वाचा