कोल्हापुरातील मध्यवस्ती राजारामपुरी नजीकच्या साळुंखे पार्क या ठिकाणी सावित्रीबाई अरुण निकम (वय 53) आणि त्यांचा मुलगा विजय निकम हे राहत होते. यामधील विजय हा सावित्रीबाई यांचा सावत्र मुलगा आहे. बुधवारी पहाटे दारुसाठी आईसोबत झालेल्या वादानंतर विजयने थेट आईचा जीव घेण्याचे पाऊल उचलले आहे. राजारामपुरी पोलिसांनी घटनास्थळीच त्याला ताब्यात घेतले आहे.
भय इथले संपत नाही, ‘तो’ बिंधास्त आला, गाडीतून पैशांची बॅग काढली अन्…, कोल्हापुरात धक्कादायक प्रकार
राजारामपुरी पोलिसांच्या माहितीनुसार, विजय निकम हा बराच काळ दारूच्या आहारी गेला होता. रोजच्या भांडणांना कंटाळलेल्या सावित्रीबाईंनी मुलाला दारूसाठी पैसे देण्यास नकार दिला. या घटनेचा राग आल्याने विजयने घरातील दगडी वरवंटा उचलून आईच्या डोक्यात जोरदार प्रहार केला. सावित्रीबाई जागीच मृत्यूमुखी पडल्या. पुरावे लपवण्याचा प्रयत्न करण्याआधीच शेजाऱ्यांच्या लक्षात हा प्रकार आल्याने त्यांनी पोलिसांना याबाबत माहिती दिली.
Kolhapur Accident : नियंत्रण सुटल्याने ओम्नी व्हॅन बाजारात घुसली; अंडी, पीठ अन् टोमॅटो रस्त्यावर विखुरले, एका महिलेचा मृत्यू

पोलिसांनी घटनास्थळी घेतली तत्पर कारवाई

राजारामपुरी पोलीस ठाण्याचे पथक आणि फॉरेन्सिक तज्ज्ञांनी तात्काळ घटनास्थळी धाव घेतली. पंचनामा करताना मृतदेह घराच्या आतील खोलीत रक्ताच्या थारोळ्यात सापडला. आरोपी विजयला ताब्यात घेऊन प्राथमिक चौकशीत त्याने गुन्ह्याची कबुली दिल्याचे समजते. पोलिसांनी हत्या प्रकरणी भादंवि कलम 302 अंतर्गत गुन्हा दाखल केला आहे.
kolhapur Crime : सराईत गुन्हेगार चिन्या हळदकरच्या खूनाचा बदला घेण्यासाठी कोल्हापूरच्या नारायण बागेत मोठा राडा, काय घडलं?

परिसरात शोक आणि संताप

या घटनेने परिसरातील नागरिकांमध्ये संताप आणि हळहळ दोन्ही भावना निर्माण झाल्या आहेत. एका दारूच्या व्यसनामुळे आईचा जीव घेणे, हे समाजासाठी मोठे धोक्याचे चिन्ह असल्याचे स्थानिकांनी सांगितले. घटना घडल्यानंतर साळुंखे पार्क परिसरात मोठी गर्दी जमल्याने काही काळ तणावाचे वातावरण निर्माण झाले होते.दरम्यान दारूच्या व्यसनामुळे घराघरात उभ्या राहणाऱ्या संकटाचे भयाण चित्र या घटनेत स्पष्ट दिसले. कोल्हापूर पोलिसांनी नागरिकांना व्यसनविरोधी मोहिमेत सहभाग घेण्याचे आवाहन केले आहे. आरोपी विजय निकम आता पोलिसांच्या ताब्यात असून तपास अधिकारी या घटनेच्या पार्श्वभूमीचा पुढील तपास करीत आहेत.