भाजीत शाम्पूचे पाणी का टाकले अशी विचारणा केल्याचा राग आल्याने रागाच्या भरात एका मजुराने आपल्या सोबत वास्तव्यास असलेल्या परप्रांतीय मजुराच्या डोक्यात टणक हत्यारांनी वार करून त्याची हत्या केल्याची घटना सोमवारी (दि.13 ऑक्टोबर) रात्री 10 वाजेच्या सुमारास नांदूरशिंगोटे येथे घडली. राजनकुमार सुरज साव (वय 35, रा.चौपारण, झारखंड) असे मृत मजुराचे नाव आहे. तर यातील संशयित अजय गाडेकर हा हिस्ट्रीसीटर गुन्हेगार असून, त्याला अटक करण्यात आली आहे.

Alibag Crime : मंदिराबाहेर कपल बसलं होतं, अचानक तरूणाने हातोडा काढला बाहेर अन् सलग तीन तास… अलिबाग हादरलं
2023 मध्ये पैठण पोलिस ठाण्यात अजयविरुद्ध खुनाचा गुन्हा दाखल आहे. फेब्रुवारी 2025 मध्ये तो दोन वर्षांची शिक्षा भोगून जामिनावर बाहेर आला आहे. अजय सुभाष गाडेकर (33, रा. पैठण, जि. छत्रपती संभाजीनगर) आणि खून झालेला कामगार नांदूरशिंगोटे येथे रामदास सानप यांच्या मळ्यातील खोलीत वास्तव्यास होते. हे दोघेजण मंगेश वावरे यांच्याकडे सेंट्रींग मजूर म्हणून कामाला होते.

सायंकाळी सुट्टी झाल्यावर सोबत काम करणारे कामगार संगमनेर येथे निघून गेले. त्यानंतर दोघांनी जेवण बनवले. जेवण बनवत असताना अजयने भाजीमध्ये शाम्पूचे पाणी ओतले. याचा राग आल्याने राजन कुमार याने त्याला विचारणा केली व दोघांचे भांडण झाले. त्यानंतर रात्री 10 वाजेच्या सुमारास या भांडणाचा राग मनात ठेवून अजयने झोपलेल्या राजन कुमार याच्या डोक्यात लोखंडी गज व टणक वस्तूने आघात करून त्याचा खून केला.

मंगळवारी सकाळी याबाबत माहिती मिळाल्यानंतर वावीचे सहाय्यक निरीक्षक गणेश शिंदे यांनी सहकाऱ्यांच्या समवेत घटनास्थळी धाव घेतली. प्रारंभी पोलिसांनी मृत राजन कुमार याचा मावसभाऊ सिंधूकुमार चलीतर साव याच्या फिर्यादीवरून आकस्मात मृत्यूची नोंद केली होती. मात्र, गाडेकर याची कसून चौकशी केली असता त्याने खुनाची कबुली दिल्यानंतर त्याच्याविरुद्ध गुन्हा दाखल करण्यात आला.