शहरात कायद्याचे रक्षकच सुरक्षित नाहीत का, असा गंभीर सवाल पुन्हा एकदा यानिमित्ताने उपस्थित झाला आहे. कोंढवा परिसरात रविवारी (12 ऑक्टोबर) रात्री पाच जणांच्या टोळक्याने वाहतूक विभागातील पोलीस कर्मचाऱ्याला बेदम मारहाण केल्याची धक्कादायक घटना घडली आहे.

या घटनेत मारहाण झालेल्या पोलीस कर्मचाऱ्याचे नाव पवन डिंबळे असे असून ते भारती विद्यापीठ वाहतूक विभागात कार्यरत असल्याची माहिती आहे. रविवारी रात्री ड्युटी संपवून घरी जात असताना त्यांच्यावर हल्ला करण्यात आला होता. या मारहाणीमध्ये डिंबळे यांना कान आणि नाकातून रक्तस्त्राव झाला असून त्यांना तात्काळ ससून रुग्णालयात दाखल करण्यात आले आहे. सध्या त्यांची प्रकृती स्थिर असल्याचे सांगण्यात आले आहे.
Pune Crime: काय रे, इंस्टाग्रामवर रिक्वेस्ट का स्वीकारली नाहीस? पुण्यात चौघांनी घेरलं, दांडक्यासह लाथा-बुक्क्यांचा प्रसाद
या प्रकरणी मिळालेल्या प्राथमिक माहितीनुसार, डिंबळे हे कोंढवा परिसरातून जात असताना एका ठिकाणी लघुशंकेसाठी थांबले होते. त्या ठिकाणी काही युवक दारू पित असल्याचे त्यांना दिसून आले. त्यामुळे त्यांनी या तरुणांना त्या ठिकाणावरून निघून जाण्यास सांगितले. यावरून वाद निर्माण झाला आणि थोड्याच वेळात त्या तरुणांचे इतर साथीदार घटनास्थळी पोहोचले. त्यांनी एकत्रितपणे डिंबळे यांच्यावर हल्ला चढवला आणि त्यांना मारहाण केली. हल्ल्यावेळी डिंबळे यांनी अंगात जॅकेट असल्याने ते पोलीस आहेत, हे हल्लेखोरांना सुरुवातीला लक्षात आले नाही. या हल्ल्यात डिंबळे यांच्या कानातून आणि नाकातून रक्तस्त्राव झाला, ते गंभीर जखमी झाले.

घटनेनंतर पोलिसांनी परिसरातील सीसीटीव्ही फुटेज तपासण्यास सुरुवात केली असून हल्लेखोरांविरोधात गुन्हा दाखल करण्यात आला आहे. या घटनेनंतर “पोलिसच सुरक्षित नसतील, तर सामान्य नागरिकांचे काय?” असा संतप्त प्रश्न पुणेकरांकडून उपस्थित केला जात आहे.