शाळा सुटल्यानंतर परिसरातील खदानीत पोहोण्यासाठी गेलेल्या दोन शाळकरी विद्यार्थ्यांचा पाण्यात बुडून मृत्यू झाला आहे. ही दुर्दैवी घटना गंगापूर तालुक्यातील रांजणगाव नर्सरी शिवारात गट क्रमांक 204 येथे असलेल्या खदानीत उघडकीस आली. अग्निशामक विभागाच्या शर्थीच्या प्रयत्नानंतर दोघांचेही मृतदेह बाहेर काढण्यात आले. या घटनेमुळे नातेवाईकांनी एकच टाहो फोडला तर गावात हळहळ व्यक्त करण्यात आली आहे.
अंत्यविधीपूर्वी पप्पाचं लाडक्या लेकीला अखेरचं गिफ्ट, फुग्यांनी तिरडी सजवली, केक कापत साजरा केला वाढदिवस
याप्रकरणी स्थानिकांनी दिलेल्या माहितीनुसार, मयूर आणि साहिल हे दोघे महालगाव येथील न्यू हायस्कूल शाळेत नववीच्या वर्गात शिकत होते. शनिवारी शाळा सुटल्यानंतर दोघे नरहरी रांजणगाव येथील खदानी जवळ गेले. तिथे गेल्यानंतर दोघांनी पाण्यात पोहण्याचा प्लॅन केला. खदानीच्या काठावर दोघांनी वह्या पुस्तक असलेली बॅग, कपडे, चप्पल काढून ठेवली. त्यानंतर दोघेही पाण्यात उतरले मात्र पाण्याचा अंदाज न आल्याने दोघांचाही पाण्यात बुडून मृत्यू झाला. काही वेळानंतर ही बाब स्थानिकांच्या लक्षात आली.

तात्काळ अग्निशामक विभागाला पाचरण करण्यात आले. घटनेची माहिती मिळताच अग्निशामक विभागाचे इन्चार्ज लक्ष्मण कोल्हे, दिनेश मंगुसे, छत्रपती केकान, विशाल गरडे, प्रणाम सूर्यवंशी, सचिन शिंदे, मनसुभराव सपकाळ, प्रशांत गायकवाड हे तात्काळ घटनास्थळी दाखल झाले. अथक प्रयत्नानंतर दोघांचा मृतदेह बाहेर काढण्यात आले. दोघांना रुग्णालयात दाखल केले असता डॉक्टरांनी तपासून मृत घोषित केले. या घटनेची माहिती मिळताच नातेवाईकांनी गर्दी केली. दोन्ही मुलांचा मृत्यू झाल्याचं कळताच नातेवाईकांनी टाहो फोडला. तर गावकऱ्यांनी हळहळ व्यक्त केली. याप्रकरणी शिल्लेगाव पोलीस ठाण्यामध्ये आकस्मित मृत्यूची नोंद करण्यात आली असून पुढील तपास शिल्लेगाव पोलीस करीत आहेत.