शनिवारी मध्यरात्री साधारण एकच्या सुमारास ही घटना घडली. बेलापूरच्या दिशेने जात असताना एका दुचाकीस्वाराचा त्याच्या वाहनावरील ताबा सुटला आणि दुचाकी थेट दुभाजकावर जाऊन आदळली. या धडकेत त्या दुचाकीवर बसलेला व्यक्ती रस्त्यावर फेकला गेला. त्याचवेळी मागून येणाऱ्या दुसऱ्या स्कूटीस्वाराने ती दुचाकी न पाहता थेट धडक दिली, आणि त्यामुळे आणखी तिघे जण जखमी झाले.

Mumbai News: बाधितांचे तातडीने पुनर्वसन करा; अंधेरी-घाटकोपर जोडमार्गावरील उड्डाणपुलाबाबत आयुक्त गगराणी यांचे निर्देश
ही घटना वाशी ते सीबीडी बेलापूर या मार्गिकेवर घडली आहे. नेरुळ सेक्टर 20 येथे राहणारा विशाल संजय सूर्यवंशी (28, व्यवसाय – नोकरी) हा युवक आपल्या स्कूटीवरून बेलापूरच्या दिशेने जात होता. भरधाव वेगामुळे त्याचा वाहनावरील ताबा सुटला आणि रस्त्याच्या कडेला असलेल्या पाण्याच्या लोखंडी पाईपला स्कूटीची जोरदार धडक बसली.

त्याच रस्त्यावरून एकाच दुचाकीवर संकेत रावसाहेब गरजे (25), यश सुनील वंजारी (23) आणि प्रणव जितेंद्र गाढवे (23) हे तिघे येत होते. पुढे थांबलेली दुचाकी दिसली नसल्याने त्यांच्या वाहनाचा वेग कमी न करता त्यांनी ती थेट धडकवली. या जोरदार धडकेत दुचाकी चालक संकेत गरजे गंभीर जखमी झाला असून, त्याच्या डाव्या हात आणि डाव्या पायाला फ्रॅक्चर झाले आहे. त्याचे दोन्ही मित्र किरकोळ जखमी झाले असून, तिघांवरही उपचार सुरू आहेत. या धडकेत विशाल गंभीर जखमी झाला असून, तो बेशुद्ध अवस्थेत आहे. सध्या त्याच्यावर बेलापूर येथील अपोलो रुग्णालयात आयसीयूमध्ये उपचार सुरू आहेत.

अपघाताची माहिती मिळताच नेरुळ पोलिस ठाण्याचे पथक तात्काळ घटनास्थळी दाखल झाले. त्यांनी सर्व जखमींना तातडीने अपोलो रुग्णालयात दाखल केले. पोलिसांनी जखमींच्या नातेवाईकांना कळवले असून, ते रुग्णालयात पोहोचले आहेत. अपघाताचा पंचनामा करण्यात आला असून, पुढील योग्य ती कारवाई सुरू आहे, अशी माहिती नेरुळचे वरिष्ठ पोलीस निरीक्षक ब्रह्मानंद नाईकवाडी यांनी दिली.