सभेत बोलताना पवार यांनी बाजार समितीच्या पेट्रोल पंपाच्या जवळपास दीड कोटी रुपयांच्या उधारीवरून व्यवस्थापकावर राग व्यक्त केला. “तुझ्या बापाचा कृषी मार्केट आहे का? ही उधारी वसूल करण्यासाठी डीवायएसपींना फोन करून सांगा, नाहीतर वेगळ्या पद्धतीने भरणा करावा लागेल,” असे ते म्हणाले. उपविभागीय पोलिस अधिकारी (डीवायएसपी) यांना निर्देश देताना पवार यांनी स्पष्ट केले की, हे काम पोलिसांचे नसले तरी उधारीदारांना फोन करून सूचना द्याव्यात.

बाजार समितीला गेल्या काळात १४९ कोटी रुपयांचा निधी मिळाला असून, समितीचे वार्षिक उत्पन्न केवळ एक कोटी रुपये आहे, असे सांगत पवार यांनी कामाचा वेग कमी असल्याबद्दल नाराजी व्यक्त केली. “यांना दीडशे कोटींचे काम करायला दीडशे वर्षे लागतील का? लाज काही आहे का?” असे म्हणत त्यांनी समितीच्या चेअरमन व व्यवस्थापकांना इशारा दिला की, “काम व्यवस्थित करा, अन्यथा मी केस दाखल करायला लावेन. मी हयगय करणार नाही.” सभेत एका तक्रारीच्या पत्रावरूनही पवार भडकले. पत्रात गैरप्रकारांचा उल्लेख असल्याने त्यांनी सहाय्यकांना सांगितले, “हे तुझ्याकडे ठेव, पाच तारखेला यांना बोलवा. मी करोडो रुपयांचा निधी आणतो आणि तुम्ही असं करताय?” तसेच, बाजारात चोरी होत असल्याबद्दल बोलताना ते म्हणाले, काही लोक नटबोळ चोरून नेतील, काही चोरून येतील. त्यांची माहिती द्या, मी पोलिसांना सांगतो टायरमध्ये घेण्यासाठी.