कोकणात चिपळूण परिसरातील रेल्वे स्टेशन जवळ असलेला गांधारेश्वर पूल पुन्हा एकदा चर्चेत आला आहे. यापूर्वी एका विवाहितेने पतीसह आत्महत्या केल्याचा प्रकार घडला होता. त्यानंतर आता पुन्हा अशीच एक घटना समोर आली आहे. चार दिवसांपूर्वी संगमेश्वर येथे एका विवाहितेने याच पुलावरून उडी मारून आत्महत्या केल्याचा धक्कादायक प्रकार घडला होता. या विवाहितेचा मृतदेह चिपळूण तालुक्यातील कालुस्ते नदीपात्र परिसरात मिळाला आहे. अपेक्षा अमोल चव्हाण, वय वर्षे 40, या महिलेने घरातील कौटुंबिक आणि आर्थिक विवंचनेतून, वादातून ही आत्महत्या केल्याची प्राथमिक माहिती पोलिसांना मिळाली आहे. ऐन नवरात्रउत्सवात हा प्रकार घडला आहे.या प्रकरणात पोलिसांकडून मिळालेल्या माहितीनुसार, रत्नागिरी जिल्ह्यातील संगमेश्वर येथील अपेक्षा अमोल चव्हाण ही बेपत्ता असल्याची तक्रार तिच्या पतीने संगमेश्वर पोलीस ठाण्यात केली होती. त्यानंतर पोलिसांनी तपास सुरू केला. त्यावेळी चिपळूण शहरात रेल्वे स्टेशन जवळ असलेल्या गांधारेश्वर पूलावर या महिलेची पर्स आणि चप्पल मिळाली होती. त्या अनुषंगाने चिपळूण पोलिसांनी युद्ध पातळीवर तपास सुरू केला होता. महिला रेल्वे स्टेशनवरुन निघून दुसरीकडे कुठे गेली, की ही आत्महत्या आहे याबाबत काही काळ संभ्रम निर्माण झाला होता. त्यानंतर महिलेचा मृतदेह कालुस्ते नदीपात्राजवळ मिळाला.अपेक्षा अमोल चव्हाण ही मंगळवारी सायंकाळी 4 वाजता अचानक घरातून कोणालाही काही न सांगता गायब झाली होती. या प्रकरणाचा संगमेश्वर पोलिसांनी तपास सुरू केला होता. या महिलेच्या मोबाईलवरुन तिचं लोकेशन सर्च केल्यानंतर हे लोकेशन चिपळूण गांधारेश्वर पूल असं दाखवण्यात आलं. याच पुलावर या आत्महत्या केलेल्या विवाहितेची पर्स आणि चप्पल या वस्तू मिळाल्या. त्यामुळे पोलिसांनी नदीत बोटीच्या सहाय्याने शोधकार्य सुरू केलं होतं. चिपळूणचे पोलीस निरिक्षक फुलचंद मेंगडे यांच्या मार्गदर्शनाखाली या प्रकरणाचा तपास सुरू होता. या परिसरातील सीसीटीव्ही फुटेजही तपासण्याचं काम पोलीस यंत्रणेकडून सुरू होतं.
सुरुवातील महिलेच्या गायब होण्याबाबत संभ्रम होता. मात्र आता ही आत्महत्या असल्याचं समोर आलं आहे. महिलेने नेमकी कोणत्या कारणामुळे आत्महत्या केली याचा तपास संगमेश्वर पोलीस करत आहेत. संगमेश्वर पोलिसांकडे या महिलेची बेपत्ता म्हणून तक्रार दाखल करण्यात आली होती. काही लोक पैशांसाठी घरी येऊन त्रास देत होते. याचं चिंतेतून तिने हे टोकाचं पाऊल उचलण्याची प्राथमिक माहिती चिपळूण पोलिसांना मिळाली आहे. याप्रकरणी अधिक तपास संगमेश्वर पोलिसांकडून सुरू करण्यात आला आहे. या महिलेला दोन मुलं असून या सगळ्या प्रकाराने कुटुंबावर दुःखाचा डोंगर कोसळला आहे.
