गोदावरी नदीला आलेल्या पुरामुळे वसरणी येथील पंचवटीनगर, जुन्या नांदेडातील गाडी पुरा, काला पूल, गौतम नगर खडकपुरा, दूल्हेशहा रहमान नगर आदी भागात मोठ्या प्रमाणात बॅक वॉटर शिरलं आहे. याच बॅकवॉटरमध्ये आज बुधवारी दुपारी शेख मिन्हाज शेख साजिद हा मुलगा पाण्यामध्ये बुडाला. तो बुडाल्याची माहिती मिळताच स्थानिक नागरिकांनी त्याचा मृतदेह पाण्याबाहेर काढला. स्थानिक नागरिकांनी महापालिकेच्या अग्निशमन दलाला पाचारण केलं होतं. महापालिकेचे पथक तेथे पोहोचलेही; मात्र त्याला स्थानिकांनी बाहेर काढून रुग्णालयात नेल्याची माहिती मिळाली होती, मात्र त्याचा मृत्यू झाला. या घटनेनं हळहळ व्यक्त होतं आहे.

पुण्यात संतापजनक प्रकार, विधवेला कामाचं आमिष दिलं, जबरदस्ती लग्न लावलं, दागिने चोरले, मुलांना ओलीस ठेवून तमाशात नाचवलं

दरम्यान, या पुरामुळे गोवर्धनघाट परिसरातील स्मशानभूमी पाण्याखाली आहे. शिवाय शनिमंदिर, नाव घाट पूल देखील बुडालं आहे. अनेक शेतात पाणी शिरल्याने पिकांचं मोठं नुकसान झालं आहे. आसना नदीला देखील पूर आला आहे. नांदेड शहरातील खडकपुरा परिसरातील सामिरा बाग येथे मुसळधार पावसामुळे आलेल्या पाण्यात एक महिला, एक पुरुष व एक लहान मूल असे तिघेजण घरामध्ये अडकले होते. घराच्या आजूबाजूला सर्वत्र पाणी शिरल्यामुळे त्यांना बाहेर पडणं शक्य नव्हतं. रहिवाशांनी तातडीने महापालिकेला संपर्क साधला. माहिती मिळताच महापालिकेच्या दलाचे कर्मचारी तात्काळ घटनास्थळी पोहचून रेस्कयू केलं आणि सर्वांना सुखरूप ठिकाणी स्थलांतर केलं.