डोंबिवलीत भाजपाचे पदाधिकाऱ्यांनी मंगळवारी सकाळी नरेंद्र मोदींचा अवमान करणाऱ्या समाज माध्यमांवरील पोस्टचा थेट समाचार घेतला. संतप्त झालेल्या भाजपाच्या पदाधिकाऱ्यांनी मामा पगारे यांना बोलावून घेतले. त्यानंतर त्यांना भर रस्त्यात साडी नेसवली. या घटनेनंतर काँग्रेस पक्ष आक्रमक झाला आहे. या घटनेवरुन काँग्रेस आणि भाजपमध्ये वाद पेटण्याची शक्यता आहे. ही घटना डोंबिवलीमध्ये घडली आहे. या घटनेनंतर राजकीय वातावरण तापले आहे. शिवाय ज्या काँग्रेस नेत्याला साडी नेसवण्यात आली, ते वयोवृद्ध आहेत. त्यामुळे या प्रकरणाला वेगळे वळण लागण्याची दाट शक्यता आहे.

भारताचे पंतप्रधान नरेंद्र मोदी यांचा साडी नेसलेला फोटो/व्हिडियो समाज माध्यमांवर व्हायरल करणारे काँग्रेसचे ज्येष्ठ नेते प्रकाश उर्फ मामा पगारे यांच्या वर्तनाबद्दल भाजपात तीव्र नाराजी व्यक्त करण्यात येत आहे. कल्याण जिल्हा भाजपाच्या वतीने काँग्रेस नेते मामा पगारे यांचा सुद्धा साडी नेसून सत्कार करण्यात आला. याच्यापुढे आमच्या वरिष्ठ नेत्यांची बदनामी केल्यास त्यांची सुद्धा हीच परिस्थिती होणार असल्याचा इशारा भाजपाच्या पदाधिकाऱ्यांनी या पार्श्वभूमीवर बोलताना दिला. देशाचे पंतप्रधान नरेंद्र मोदी मॉर्फ फोटो/व्हिडिओ समाज माध्यमांवर व्हायरल करणे काँग्रेसचे ज्येष्ठ नेते प्रकाश उर्फ मामा पगारे यांना चांगलेच भारी पडले आहे.

भाजपाच्या पदाधिकाऱ्यांनी आपल्याशी गैरवर्तन केले आहे. आपल्याशी संभाषण करताना जातीवाचक शब्दांचा वापर केला आहे. त्यामुळे आपल्या जातीचा उल्लेख करून आपल्यासह बहुजन समाजाचा अपमान भाजपाच्या डोंबिवलीतील पदाधिकाऱ्यांनी केला आहे. त्यामुळे आपल्याशी गैरवर्तन करणाऱ्या भाजपाच्या पदाधिकाऱ्यांवर अनुसूचित जाती/जमाती अत्याचार प्रतिबंधक कायद्याने आपण पोलीस ठाण्यात तक्रार करणार आहोत, अशी माहिती डोंबिवलीतील काँग्रेसचे ज्येष्ठ नेते मामा पगारे यांनी प्रसिध्दी माध्यमांशी संवाद साधताना दिली.

गेल्या चाळीस-पन्नास वर्षांपासून काँग्रेसच्या विचारधारेवर चालणारा कार्यकर्ता आहे. त्यामुळे भाजपाच्या कुरघोड्यांना आम्ही अजिबात जुमानत नाही. आपल्या बरोबर भाजपचे जिल्हाध्यक्ष नंदू परब, रिक्षा संघटनेचा एक पदाधिकारी आणि इतर दहा-पंधरा जणांनी गैरवर्तन केले आहे. झुंडशाहीची ही मनोवृत्ती डोंबिवलीत अजिबात खपवून घेतली जाणार नाही. आपल्या व्यक्ति स्वातंत्र्यावर घाला घालण्याचा प्रयत्न भाजपाच्या झुंड टोळीने केला आहे. त्यांच्यावर कठोर कारवाई झालीच पाहिजे. यासाठी आपण आग्रही असणार आहोत, असे मामा पगारे यांनी माध्यमांना बोलताना म्हटले.

काँग्रेसने भाजपाला कधी दटावले का ? : जिल्हाध्यक्ष

यापूर्वी काँग्रेसची राजवट असताना भाजपाचे कार्यकर्ते काँग्रेसचे पंतप्रधान आणि नेत्यांविषयी समाज माध्यमांवर अवमानकारक मजकूर प्रसारित करत होते. काँग्रेस कार्यकर्त्यांनी कधी भाजपाच्या कार्यकर्त्यांना घरी जाऊन वा रस्त्यात गाठून दटावल्याची प्रकरणे नाहीत. मग आताच भाजपाच्या कार्यकर्त्यांना राग का येऊ लागला आहे. आपण डोंबिवलीतील काँग्रेसच्या ७२ वर्षाच्या ज्येष्ठ नेत्याशी गैरवर्तन करत आहोत याचे भान सुसंस्कृतीचे गोडवे गाणाऱ्या भाजपाच्या पदाधिकाऱ्यांना असणे आवश्यक होते. पण हे कृत्य करणारे पदाधिकारी गुन्हेगारी पार्श्वभूमीचे आहेत. त्यामुळे त्यांच्याकडून फार काही अपेक्षा नाही. मामा पगारे यांना साडी नेसवून एक प्रकारे समस्त महिला वर्गाचा अपमान करण्याचा प्रयत्न भाजपाच्या डोंबिवलीतील पदाधिकाऱ्यांनी केला आहे. त्यांच्यावर कठोर कारवाई झालीच पाहिजे यासाठी आम्ही पोलिस उपायुक्त अतुल झेंडे यांची भेट घेऊन तक्रार देणार असल्याचे काँग्रसचे जिल्हाध्यक्ष सचिन पोटे यांनी प्रसार माध्यमांशी संवाद साधताना सांगितले.

कठोर कारवाई झालीच पाहिजे : मामा पगारे

समाज माध्यमांवर पंतप्रधान नरेंद्र मोदी यांचा साडी नेसलेला फोटो/व्हिडियो प्रसारित झाला होता. ती आपण पुढे पाठवली. त्यानंतर आपणास सोमवारी संदीप माळी यांच्या मोबाईलवरून सुरेश पाटील बोलतो आहे. एका इमारतीचे काम आहे, असे बोलून भेटीची वेळ मागितली. आपण त्यांना मंगळवारी सकाळी भेटू सांंगितले, असे मामा पगारे यांनी सांगितले. मंगळवारी सकाळी आपण मुलासह डोळे दाखविण्यासाठी नेत्र रूग्णालयात गेलो होतो. त्यावेळी पुन्हा संदीप माळी यांनी आपणास कुठे आहात ? अशी विचारणा केली. आपण नेत्र रूग्णालयात आहोत, असे सांगितले. तोपर्यंत माळी आणि त्यांचे सहकारी रूग्णालयाच्या बाहेर आले. रूग्णालयातून मी बाहेर पडताच सर्वांनी पकडून आपणास साडी नेसवली. आपण त्यांना करत असलेला प्रकार योग्य नसल्याचे सांगितले. आपल्याशी गैरवर्तन करणाऱ्यांवर कठोर कारवाई झाल्याशिवाय आपण स्वस्थ बसणार नाही, असा इशारा काँग्रेस ज्येष्ठ नेते मामा पगारे यांनी या पार्श्वभूमीवर बोलताना दिला.