काही दिवसांपूर्वी महायुती सरकारची कॅबिनेट बैठक झाली. या बैठकीनंतर उपमुख्यमंत्री आणि शिवसेनेचे प्रमुख नेते एकनाथ शिंदे यांनी त्यांच्या पक्षाच्या मंत्र्यांची निर्मल भवनमध्ये गुप्त बैठक घेतली. या बैठकीत शिंदे यांनी त्यांच्या पक्षाच्या मंत्र्यांना कडक शब्दांत सुनावलं. प्रशासकीय कामाची पद्धत आणि पक्ष संघटनेकडे होणारं दुर्लक्ष यावरुन शिंदे यांनी नाराजी बोलून दाखवली. यावेळी शिंदे यांनी त्यांच्या मंत्र्यांची चांगलीच कानउघाडणी केली. एबीपी माझानं याबद्दलचं वृत्त दिलं आहे.

एकनाथ शिंदे यांनी अकार्यक्षम मंत्र्यांना सुनावलं. त्यांच्या कार्य पद्धतीवर नाराजी व्यक्त केली. मंत्र्यांची प्रशासकीय कामाची पद्धत, पक्ष संघटनेकडे त्यांचं होणारं दुर्लक्ष याबद्दल शिंदे यांनी मंत्र्यांना सुनावलं. शिंदे यांनी मंत्र्यांना जनता दरबार घेण्याच्या सूचना दिल्या होत्या. पण त्याकडे अनेकांनी दुर्लक्ष केलं. त्याबद्दल शिंदे यांनी नाराजी बोलून दाखवली. अनेक मंत्री पक्ष संघटनेसाठी काम करत नसल्याच्या तक्रारी शिंदे यांच्याकडे येत आहेत. त्यामुळे शिंदे यांनी संताप व्यक्त केला.

सोमवार ते बुधवार कॅबिनेटच्या बैठका आणि त्यानंतर मतदारसंघ अशी शिवसेनेच्या बऱ्याच मंत्र्यांच्या कामाची पद्धत आहे. या कार्यपद्धतीवर शिंदे यांनी नाराजी व्यक्त केली. जनतेचे प्रश्न सोडवा, अन्यथा विचार करावा लागेल, असा गर्भित इशारा शिंदे यांनी मंत्र्यांना दिला. त्यामुळे शिंदेसेनेत खळबळ उडाली आहे. मंत्रिपदावरुन उचलबांगडी होण्याची भीती अनेकांना वाटू लागली आहे.

राष्ट्रवादी काँग्रेसचे राष्ट्रीय अध्यक्ष आणि उपमुख्यमंत्री अजित पवार यांनी गेल्याच आठवड्यात त्यांच्या पक्षाच्या मंत्र्यांना कार्यक्षमता वाढवण्याच्या सूचना दिल्या होत्या. पालकमंत्री असूनही त्या जिल्ह्यांमध्ये न फिरकणाऱ्या अजित पवार संतापले होते. जिल्ह्यात केवळ तोंड दाखवण्यासाठी येऊ नका. अन्यथा खुर्च्या रिकाम्या करण्याची तयारी ठेवा, असा निर्वाणीचा इशारा अजित पवार यांनी त्यांच्या मंत्र्यांना दिला होता.